ނ. ހޮޅުދޫގައި ޒަޚަމްތަކަކާއި އެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ތަޙުޤީޤުކުރަން ފަށައިފިއެވެ.

އެޗްއާރްސީއެމުން ހާމަކުރި ގޮތުގައި، ޒަކިއްޔާ މޫސާގެ މަރުގެ މައްސަލައާއި ގުޅިގެން އޭނާގެ ގާތްތިމާގެ މީހުންގެ ފަރާތުން ކޮމިޝަނަށް ޝަކުވާ ހުށަހަޅާފައިވެއެވެ. މި ޝަކުވާގައި، މައްސަލައިގެ ތަޙުޤީޤު ކުރިއަށްދާ ގޮތާއި މެދު ކަންބޮޑުވުންތަކެއް ފާޅުކޮށްފައިވާ ކަމަށް އެޗްއާރްސީއެމުން ބުނެފައި ވެއެވެ.

އެޗްއާރްސީއެމުން ބުނީ، މި މައްސަލައާއި ގުޅިގެން ކަމާއި ގުޅުންހުރި އިދާރާތަކުން ޢަމަލު ކުރަމުންދާ ގޮތް ބަލަމުންދާ ކަމަށެވެ. އަދި މިކަމާއި ގުޅުންހުރި ލިޔެކިޔުންތައް ހޯދައި، ދިރާސާ ކުރަމުންދާ ކަމަށެވެ.

ނ. ހޮޅުދޫ، ނިއުލައިފް ގޭގައި ދިރިއުޅެމުން އައި ޢުމުރުން 50 އަހަރުގެ ޒަކިއްޔާ މޫސާ މަނިކު މަރުވެފައި އޮއްވާ ފެނުނީ މިދިޔަ ސެޕްޓެމްބަރު މަހުގެ 10 ވަނަ ދުވަހުއެވެ. ފުލުހުންގެ ފަރާތުން ކުރިން ހާމަކޮށްފައިވާ މަޢުލޫމާތު ތަކަށް ބަލާއިރު، ޒަކިއްޔާ މަރުވެފައި އޮތްވާ ފެނުނީ އޭނާ ދިރިއުޅޭ ގޭގެ ގުދަނެއްގެ ތެރޭގައި ވެއްޓިފައި އޮއްވައެވެ. އޭނާގެ ހަށިގަނޑުގައި ޒަޚަމްތަކެއް ފެންނަން ހުރި ކަމަށާއި، އޭނާ އޮތް ދިމާލުގައި ވަޅިއެއް ވެސް އޮތް ކަމަށް ފުލުހުން ވިދާޅުވެފައި ވެއެވެ.

މި މައްސަލައިގައި ސުވާލު އުފެދޭ ގިނަ ކަންތައްތަކެއް ހުރިކަމަށްބުނެ ހޮޅުދޫގެ ރައްޔިތުން ދަނީ ކަންބޮޑުވުން ފާޅުކުރަމުންނެވެ. މައްސަލައިގެ ތަޙުޤީޤަށް އިތުރު ބައެއްގެ ރައުޔު ހޯދުމުގެ ގޮތުން އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އާއި ތަޙުޤީޤުގައި ދިވެހި ފުލުހުން ހޯދާފައިވާ ހޯދުންތައް ހިއްސާކޮށް އެހީތެރިކަން ހޯދަމުންދާ ކަމަށް ވެސް ފުލުހުން ވަނީ މީގެކުރިން ވިދާޅުވެފައެވެ.