ރާއްޖޭގައި މިހާތަނަށް ހިންގާ އެންމެ ބޮޑު ފްލޯޓިން ސޯލާ ޕްރޮޖެކްޓަށް ބޯޑް އޮފް އިންވެސްޓްމަންޓްސް (ބީއޯއައި) އިން ޑެވެލޮޕްމަންޓް ހުއްދަ ދީފިކަމަށް އިކޮނޮމިކް މިނިސްޓްރީން މިއަދު ހާމަކޮށްފިއެވެ. މި ޕްރޮޖެކްޓަކީ ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ހިންގާ ފުރަތަމަ ޕްރޮޖެކްޓެވެ.
ގާތްގަނޑަކަށް 1.6 ބިލިއަން ރުފިޔާ ޚަރަދުވާނެ ކަމަށް ލަފާކުރެވޭ މި ޕްރޮޖެކްޓުގެ ފުރަތަމަ މަރުހަލާގެ ހުއްދަ ކެނެޑާގެ އެބްރަކްސަސް ޕަވަރ ކޯޕަރޭޝަނަށް މިދިޔަ އަހަރުގެ އެޕްރީލް މަހު ވަނީ ދީފައެވެ. މި ހުއްދަ ދީފައިވަނީ ހުޅުމާލެއާއި ގާތްގަނޑަކަށް 4-5 ކިލޯމީޓަރު ދުރުގައި އޮންނަ ފަޅެއްގައި 100 މެގަވޮޓްގެ ފްލޯޓިން ސޯލާ ފޮޓޯވޯލްޓައިކް (ޕީވީ) ޕްރޮޖެކްޓެއް ތަރައްގީކޮށް ހިންގުމަށެވެ.
އިކޮނޮމިކް މިނިސްޓްރީން ބުނާ ގޮތުގައި މި މަޝްރޫއަކީ ފޮސިލް ފިއުލްއަށް ބަރޯސާވާ މިންވަރު ކުޑަކުރުމަށް މުހިންމު ދައުރެއް އަދާކުރާނެ ޕްރޮޖެކްޓެކެވެ. އަދި މި ޕްރޮޖެކްޓުގެ ސަބަބުން ގައުމީ ތެލުގެ ބިލުން އަހަރަކު 42 މިލިއަން ޑޮލަރު ސަލާމަތްވާނެ ކަމަށް އަންދާޒާ ކުރެވެއެވެ.
Advertisement
ރައީސް ޑރ. މުޙައްމަދު މުޢިއްޒު ވިދާޅުވެފައިވަނީ މި މަޝްރޫއުގެ އަމަލީ މަސައްކަތް މި އަހަރުގެ މެދުތެރޭގައި ފެށި، 2027 ވަނަ އަހަރުގެ ތެރޭގައި ނިމި، އޭގެ ނަފާ ލިބެން ފަށާނެ ކަމަށެވެ. އަދި ސަރުކާރުގެ އަމާޒަކީ 2028 ވަނަ އަހަރު ނިމޭއިރު ރާއްޖޭގައި ބޭނުންކުރާ ހަކަތައިގެ 33 ޕަސެންޓު އިޔާދަކުރަނިވި ހަކަތައަށް ބަދަލުކުރުން ކަމަށް ވެސް ރައީސް ވިދާޅުވިއެވެ.
މި މަޝްރޫއުގެ ދަށުން ބެޓެރީ ސްޓޯރޭޖްގެ އިންވެސްޓްމަންޓް ތަކާއި ހުޅުމާލޭގެ މައި ގްރިޑަށް ސަބްމެރިން ކޭބަލް އިންޓަކަނެކްޝަން ވެސް ހިމެނެއެވެ. މިއީ ރާއްޖޭގެ ހަކަތައިގެ ދާއިރާގައި މިހާތަނަށް ކުރެވޭ އެންމެ ބޮޑު އެއް އިންވެސްޓްމަންޓެވެ.
މި ޕްރޮޖެކްޓަކީ ރާއްޖޭގެ ތިމާވެށި ހިމާޔަތް ކުރުމަށާއި، ދެމެހެއްޓެނިވި ތަރައްޤީ އަށް އެޅޭ މުހިންމު ފިޔަވަޅެއްގެ ގޮތުގައި ވެސް ބެލެވެއެވެ. އިކޮނޮމިކް މިނިސްޓްރީން ފާހަގަކުރާ ގޮތުގައި، މިހާރު ރާއްޖޭގައި ކަރަންޓު އުފެއްދުމަށާއި ކަނޑުދަތުރުފަތުރަށް ބޭނުންވާ ޑީސަލްގެ ގޮތުގައި ގާތްގަނޑަކަށް 80 އިންސައްތަ އިމްޕޯޓްކުރަން ޖެހެއެވެ. މި ޕްރޮޖެކްޓުގެ ސަބަބުން މި އަދަދު މަދުކުރެވި، ރާއްޖޭގެ ކާބަން ފުޓްޕްރިންޓް ކުޑަކުރުމަށް އެހީތެރިވެދޭނެއެވެ.
ރައްޔިތުންގެ މަޖިލީހުގައި އިއްވެވި ރިޔާސީ ބަޔާނުގައި މި ޕްރޮޖެކްޓާ ގުޅޭގޮތުން ރައީސް ދެއްކެވި ވާހަކަފުޅުގައި، މިފަދަ މަޝްރޫއު ތަކަކީ ރާއްޖޭގެ އިޤްތިޞާދީ ކުރިއެރުމަށާއި ތިމާވެށި ހިމާޔަތް ކުރުމަށް ކޮންމެހެން ބޭނުންވާ ކަންކަން ކަމުގައި ފާހަގަ ކުރެއްވިއެވެ.
