އިންޑިޔާއާއި ދިވެހިރާއްޖެއާ ދެމެދު ކުރެވޭ ވިޔަފާރިތަކުގައި ދެ ޤައުމުގެ ފައިސާ ބޭނުންކުރެވޭގޮތަށް ހަމަޖެއްސުމުން، ދެ ޤައުމުގެ ދެމެދުގައި ކުރެވޭ އިންވެސްޓްމެންޓްތައް އިތުރުވެގެންދާނެކަމަށް އިކޮނޮމިކް މިނިސްޓްރީން މިއަދު ބުނެފިއެވެ.
ދިވެހިރާއްޖެއާއި އިންޑިޔާއާ ދެމެދު ކުރެވޭ ފައިސާގެ މުޢާމަލާތްތަކުގައި އެ ޤައުމެއްގެ އަމިއްލަ ފައިސާ ބޭނުންކުރުމާ ގުޅޭ އެއްބަސްވުމެއްގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ރިޒާވް ބޭންކް އޮފް އިންޑިޔާ (އާރްބީއައި) އާ ދެމެދު ސޮއިކުރެވިފައިވަނީ މިދިޔަ ބުރާސްފަތި ދުވަހުއެވެ.
މި އެއްބަސްވުމާއި ގުޅިގެން އިކޮނޮމިކް މިނިސްޓްރީން ނެރުނު ބަޔާނުގައި ފާހަގަކޮށްފައިވަނީ ދެ ޤައުމުގެ ދެމެދުގައި ކުރެވޭ ވިޔަފާރިތަކުގައި ދެ ޤައުމުގެ ފައިސާ ބޭނުންކުރަން ފެށުމުން، ދެ ޤައުމުގެ މެދުގައި ވިޔަފާރިއާއި އިންވެސްޓްމަންޓްގެ ގުޅުންތައް އިތުރަށް ހަރުދަނާވެގެންދާނެ ކަމަށެވެ.
Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާއިތުވި މަހު އިންޑިޔާއަށް ކުރެއްވި ރަސްމީ ދަތުރުފުޅަށްފަހު، ކުރު މުއްދަތެއްގެ ތެރޭގައި މި އެއްބަސްވުމުގައި ސޮއިކުރެވުނުކަން މިނިސްޓްރީން ފާހަގަކޮށްފައިވެއެވެ. އަދި މިކަމުން ދައްކުވައިދެނީ ދެ ޤައުމުގެ ދެމެދުގައި އޮތް ބަދަހި ގުޅުން ކަމަށްވެސް މިނިސްޓްރީން ބުނެފައިވެއެވެ.
މީގެ އިތުރުން، މި އެއްބަސްވުމަކީ ރާއްޖޭގެ އިޤްތިޞާދު ފުޅާކޮށް، ބައިނަލްއަޤްވާމީ ބައިވެރިންނާއެކު ވިޔަފާރީގެ ގުޅުން ވަރުގަދަކުރުމަށް ރައީސް މުޢިއްޒު ގެންގުޅުއްވާ ސިޔާސަތުގެ ދަށުން އެޅުނު މުހިންމު ފިޔަވަޅެއްކަން މިނިސްޓްރީން ވަނީ އިތުރަށް ފާހަގަކޮށްފައެވެ.
ޑޮލަރުގެ ދަތިކަން އިތުރުވެފައިވާ މި ދަނޑިވަޅުގައި، ދިވެހި ސަރުކާރުން ދަނީ ބޭރު ޤައުމުތަކާއެކު ކުރެވޭ ވިޔަފާރިތަކުގައި އަމިއްލަ ފައިސާ ބޭނުންކުރެވޭނެ ގޮތްތައް ހޯދުމަށް މަސައްކަތްކުރަމުންނެވެ. މިގޮތުން ޗައިނާ އާއެކުވެސް މިފަދަ އެއްބަސްވުމެއް ޤާއިމުކުރުމުގެ މަސައްކަތް ކުރިއަށްދާކަން ފާހަގަކުރެވެއެވެ.
