އިއްޔެ އިޒްރޭލުގެ ސިފައިން ހިންގި އޮޕަރޭޝަނެއްގައި އޮކިއުޕައިޑް ވެސްޓް ބޭންކުން މަދުވެގެން ފަލަސްތީނުގެ 30 މީހުން ގަދަކަމުން ފޭރިގަނެ ވަގަށް ނަގައިގެން ގޮސް ހައްޔަރުކޮށްފި ކަމަށް ބައެއް ހަބަރުތައް ބުނެއެވެ.

ފަލަސްތީނުގެ ޖަލު ބަންދުގައި ތިބޭ މީހުންގެ ކަންކަމާއި ގުޅޭ ހަބރުތައް ގެނެސްދޭ ނޫހަކުން ބުނީ ކޮމިޝަން އޮފް ޑިޓެއިނީސް އެފެއާޒް އަދި ޕެލެސްޓީނިއަން ޕްރިޒަނަރ ސޮސައިޓީން ނެރުނު ބަޔާނެއްގައި ބުނެފައިވާ ގޮތުގައި ހައްޔަރުކުރެވުނު މީހުންގެ ތެރޭގައި ކުޑަކުއްޖަކާއި ކުރިން ޖަލުގައި ހުރި މީހުން ހިމެނޭ ކަމަށެވެ. އެމީހުން ގަދަކަމުން ހިފައި ކިޑްނެޕް ކޮށްގެން ގެންދިޔައީ އިރުމަތީ ޖެރޫސަލަމް، ހެބްރޯން، ޓޫބާސް، ޓުލްކަރަމް، ގަލްގިލިޔާ، ނަބްލުސް އަދި ރާމަﷲ އިންނެވެ.

އިޒްރޭލުގެ ސިފައިން ވަނީ ވެސްޓް ބޭންކުގެ އެކި ރަށްރަށާއި ރެފިއުޖީ ކޭމްޕްތަކުގައި ގިނަ އަދަދެއްގެ ފަލަސްތީނު ރައްޔިތުންނާއި ސުވާލުކޮށްފައިވާ ކަމަށް ޑިޓެއިނީސް އެފެއާޒް އަދި ޕެލެސްޓީނިއަން ޕްރިޒަނަރ ސޮސައިޓީގެ ބަޔާނުގައި ބުނެފައި ވެއެވެ.

ޖެނުއަރީ 21 ގައި އިޒްރޭލުގެ ސިފައިން ވަނީ ޖެނިން ސިޓީއާއި އެތަނުގެ ރެފިއުޖީ ކޭމްޕަށް ހަމަލާދީފައެވެ. ފަހުން މި ހަމަލާ ޓުލްކަރަމް ސިޓީއަށް ފުޅާކޮށް، ގިނަ އަދަދެއްގެ ފަލަސްތީނުންގެ ގެތައް ވަނީ ތަޅާލާފައެވެ. މިކަމުގެ ސަބަބުން ހާހުން ގުނާ އަދަދެއްގެ މީހުން ވަނީ ގެތަކުން ނުކުންނަން މަޖުބޫރު ވެފައެވެ.

އާދީއްތަ ދުވަހު އިޒްރޭލުގެ ސިފައިން ވަނީ އުތުރު ވެސްޓް ބޭންކުގެ ޓޫބާސް ސިޓީގެ ތަމްމޫން ރަށާއި އަލް-ފަރާ ރެފިއުޖީ ކޭމްޕަށް ހަމަލާ ދީފައެވެ.

ފަލަސްތީނުގެ ތަފާސްހިސާބުތަކުން ދައްކާ ގޮތުގައި 2023 ގެ އޮކްޓޯބަރުން ފެށިގެން ވެސްޓް ބޭންކުން އިޒްރޭލުގެ ސިފައިން ހައްޔަރުކޮށްފައިވާ ފަލަސްތީނުންގެ އަދަދު 14,300 އަށްވުރެ އިތުރުވެއެވެ. މީގެ ތެރޭގައި ހައްޔަރުކުރުމަށްފަހު ދޫކޮށްލާފައިވާ މީހުންވެސް ހިމެނެއެވެ. ނަމަވެސް މި އަދަދުގައި ގާޒާ ސްޓްރިޕްއިން ހައްޔަރުކޮށްފައިވާ މީހުން ނުހިމެނެއެވެ. ގާޒާއިން ހައްޔަރުކޮށްފައިވާ މީހުންގެ އަދަދު އުޅޭނީ ހާހުން މަތީގައި ކަމަށް ލަފާ ކުރެވެއެވެ.

ފަލަސްތީނުގެ އިންސާނީ ޙައްޤުތަކާބެހޭ ޖަމްޢިއްޔާތަކުން ލަފާކުރާ ގޮތުގައި މިހާރު އިޒްރޭލުގެ ޖަލުތަކުގައި 10,000 އަށްވުރެ ގިނަ ފަލަސްތީނުން ބަންދުކޮށްފައި އެބަތިއްބެވެ. މީގެ ތެރޭގައި ދަޢުވާއެއް ނުކޮށް އަދި ޝަރީޢަތެއް ނުހިންގައި އިދާރީ ބަންދުގައި ބަހައްޓާފައިވާ 3,379 މީހުން ހިމެނެއެވެ.