އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އީ-ޕޯޓަލް މެދުވެރިކޮށް މިހާރު ގާތްތިމާގެ މީހުންނާއި އަދި ބެލުމުގެ ދަށުގައި ތިބޭ މީހުންގެ އެޕޮއިންޓްމަންޓު ހެއްދުމާއި ލެބް ރިޕޯޓްސް އަދި މެޑިކަލް ރިކޯޑްސް ބަލާލެވޭނެ ކަމަށް އައިޖީއެމްއެޗްއިން މިއަދު ހާމަކޮށްފިއެވެ.

އައިޖީއެމްއެޗްގެ އީ-ޕޯޓަލް ޚިދުމަތް ފަށާފައިވަނީ 2021 ވަނަ އަހަރުއެވެ. މި ޚިދުމަތް މެދުވެރިކޮށް ހުރިހާ މެޑިކަލް ރެކޯޑްތަކެއް ޑިޖިޓަލްކޮށް ބަލާލެވެއެވެ. އަދި މި ޕޯޓަލު މެދުވެރިކޮށް ބަލިމީހުންނަށް އެޕޮއިންޓްމަންޓް ހެދުމާއި، ބޭސް ސިޓީއާއި ލެބް ރިޕޯޓު އަދި އެހެނިހެން ލިޔެކިޔުންތައް ބަލާލެވެއެވެ.

އައިޖީއެމްއެޗްއިން މަޢުލޫމާތު ދެއްވި ގޮތުގައި، މިހާތަނަށް އީ-ޕޯޓަލުން ސިއްޚީ ލިޔެކިޔުންތައް ބަލާލެވެނީ ލޮގިންވާ ފަރާތުގެ އެކަންޏެވެ. ނަމަވެސް، ޚިދުމަތް ހޯދާ ފަރާތްތަކަށް ފަސޭހަކޮށްދިނުމަށްޓަކައި މިހާރު ވަނީ ގާތްތިމާގެ މީހުންނާއި އަދި ބެލުމުގެ ދަށުގައި ތިބޭ މީހުންގެ އެޕޮއިންޓްމަންޓު ހެދުމާއި، ލެބް ރިޕޯޓުތައް އަދި މެޑިކަލް ރިކޯޑުތައް ބަލާލެވޭނެ ގޮތް ހަމަޖައްސާފައެވެ.

އައިޖީއެމްއެޗަކީ ގިނަ ޢަދަދެއްގެ ބަޔަކު ސިއްހީ ޚިދުމަތަށް ބަރޯސާވާ ސަރުކާރުގެ މައި ހޮސްޕިޓަލެވެ. މިއާ އެކު ހޮސްޕިޓަލުގެ ޚިދުމަތްތައް ފުޅާކޮށް ލުއިފަސޭހަ ކުރުމަށް އައިޖީއެމްއެޗުން ހާއްސަ އިސްކަމެއް ދެއްވާކަން ފާހަގަކުރެވެއެވެ.