ފިއުލް ސަޕްލައި މޯލްޑިވްސް (އެފްއެސްއެމް) އިން މާލެ އަދި ހުޅުމާލޭގައި ހިންގާ ޝެޑުތަކުން ފުޅިއަށް އަދި ހަންހަމަށް ތެޔޮދޫކުރާ އުސޫލަށް ބަދަލުގެނައުމަށް ނިންމައިފިއެވެ. މި ބަދަލު ތަންފީޒުކުރަން ފަށާނީ އަންނަ މަހުގެ 1 ވަނަ ދުވަހުން ފެށިގެންނެވެ.

އެފްއެސްއެމްއިން ބުނީ، އައު އުސޫލުގެ ދަށުން ފުޅިއަކަށް ކަސްޓަމަރަކަށް ގިނަވެގެން ދޫކުރެވޭނީ ދުވާލަކަށް 3 ލީޓަރު ކަމަށެވެ. އަދި ފުޅިއަށް ތެޔޮ އަޅައިދެވޭނީ އެ ކަސްޓަމަރެއްގެ އައިޑީކާޑު ހުށަހެޅުމުން ކަމަށް ވެސް އެފްއެސްއެމްއިން ބުންޏެވެ.

އެގޮތުން، ހަންހަމަށް ތެޔޮ ދޫކުރުމުގެ އުސޫލަށް ވެސް ބަދަލު ގެނެވިފައި ވެއެވެ. މިގޮތުން ހަންހަމަށް ތެޔޮ ދޫކުރެވޭނީ، ޑިންގީ ނުވަތަ ލޯންޗެއްގެ ރަޖިސްޓްރީއަށް ބަލައި، ދުވާލަކަށް ގިނަވެގެން 80 ލީޓަރު ކަމަށް އެފްއެސްއެމްއިން ހާމަކުރިއެވެ.

މި ބަދަލުތައް ގެނައުމަށް ނިންމާފައިވަނީ ދެ ސަބަބަކަށްޓަކައި ކަމަށް އެފްއެސްއެމްއިން ބުންޏެވެ. އެއީ؛

• ސަލާމަތީ މިންގަނޑުތަކަށް ބަލައި އުސޫލަށް ބަދަލު ގެންނަން ފެންނާތީ އާއި،
• ޚިދުމަތް ލިބިގަންނަ ފަރާތްތަކަށް އަވަހަށް ޚިދުމަތް ފޯރުކޮށްދިނުމުގެ މަޤްޞަދުގައި ކަމަށް ބުންޏެވެ.

މި ބަދަލާއެކު، ތެޔޮ ގަތުމަށް އަންނަ ފަރާތްތަކުން އައިޑީކާޑު ގެންނަންޖެހޭނެ ކަމަށާއި، ކަނޑު އުޅަނދުފަހަރުގެ ވެރިފަރާތްތަކުން އުޅަނދުގެ ރަޖިސްޓްރީ ގެންނަން ޖެހޭނެ ކަމަށް އެފްއެސްއެމްއިން އަންގަވާފައި ވެއެވެ.