ގިނަ ގޯލުތަކާއެކު ސިޓީ، ލިވްޕޫލް އަދި ޗެލްސީ އެފްއޭކަޕްގެ ހަތަރުވަނަ ބުރަށް

ގިނ ގޯލުތަކާއެކު ސިޓީ އާއި ލިވަޕޫލް އަދި ޗެލްސީ އިނގިރޭސި އެފްއޭ ކަޕްގެ ތިން ވަނަ ބުރު ފަހަނައަޅައި، މުބާރާތުގެ ހަތަރު ވަނަ ބުރަށް ދަތުރުކޮށްފިއެވެ.

ރޭ ކުޅުނު މެޗުތަކުގައި މެންޗެސްޓާ ސިޓީން އިނގިރޭސި ތިން ވަނަ ޑިވިޝަނުގެ ސަލްފޯޑް 8-0 އިން ބަލިކުރިއެވެ. ލިވަޕޫލުން ތިން ވަނަ ޑިވިޝަނުގެ އެކްރިންޓަން ސްޓޭންލީ 4-0 އިން ބަލިކުރިއިރު، ޗެލްސީން ހަމަ އެ ޑިވިޝަނުގެ މޯކޭމްބް 5-0 އިން ބަލިކުރިއެވެ.

^{ޖޭމްސް މެކްއަޓީ އޭނާގެ 3 ވަނަ ލަނޑު އަދި ސިޓީގެ 8 ވަނަ ލަނޑު އެތިހާދުގައި ގޯލަށް ވައްދާލަނީ / ފޮޓޯ: ރޮއިޓާސް}

މެންޗެސްޓާ ސިޓީގެ މެޗުގައި އިނގިރޭސި މިޑްފީލްޑަރު ޖޭމްސް މެކްއަޓީ ހެޓްރިކެއް ހެދިއެވެ. މިއީ 2019 ވަނަ އަހަރަށް ފަހު ސިޓީން މުބާރާތެއްގައި ހޯދި އެންމެ ބޮޑު މޮޅެވެ. މި މެޗުގައި ސިޓީގެ ޖެރެމީ ޑޮކޫ ދެ ގޯލު ޖެހިއިރު ޖެކް ގްރީލިޝް، ޑިވިން މުބާމާ އަދި ނިކޯ އޯރެއިލީ ވެސް ލަނޑު ޖަހައިފައިވެއެވެ.

^{ޓްރެންޓް އަލެކްސަންޑަ އާނޯލްޑް ފޮނުވާލި ބޯޅަ ގޯލަށް ވަންނަނީ. މިއީ ލިވަޕޫލްގެ ދެވަނަ ލަނޑު / ފޯޓޯ: ރޮއިޓާސް.}

ލިވަޕޫލްގެ މެޗުގައި ޑިއޯގޯ ޖޮޓާ، ޓްރެންޓް އަލެކްސަންޑަ އާނޯލްޑް، ޖޭޑަން ޑޭންސް އަދި ފެޑެރީކޯ ކިއޭޒާ ލަނޑު ޖެހިއެވެ. މި މެޗުގައި 16 އަހަރުގެ ރިއޯ އެންގުމޯހާ ލިވަޕޫލްގެ ފުރަތަމަ 11 ގައި ފުރަތަމަ ފަހަރަށް ކުޅެފައިވެއެވެ.

^{ޗެލްސީން މޯކޭމްބަ ކޮޅަށް ރޭ ގޯލެއް ޖަހނީ.}

ޗެލްސީގެ މެޗުގައި ސްޓެފަން އެންކުންކޫ، ޖޮއާއޯ ފެލިކްސް އަދި ޓޮސިން އަޑަރާބިއޯޔޯ ލަނޑު ޖެހިއެވެ. ޖޮއާއޯ ފެލިކްސް ދެ މިނިޓުގެ ތެރޭގައި ދެ ލަނޑު ޖަހައި މޮޅު ކުޅުމެއް ދެއްކިއެވެ.

އެފްއޭ ކަޕްގެ ތިން ވަނަ ބުރުގެ އެހެން މެޗުތަކަށް ބަލާއިރު، އެސްޓަން ވިލާ އިން ވެސްޓް ހޭމް ޔުނައިޓެޑް 2-1 އިން ބަލިކުރިއިރު، ވުލްވްސް އިން ވނީ ބްރިސްޓަލް ސިޓީ 2-1 އިން ބަލިކޮށްފައެވެ. މީގެ އިތުރުން ނޮޓިންހަމް ފޮރެސްޓުން ލޫޓަން ޓައުން 2-0 އިން ބަލިކޮށްފައި ވާއިރު ބްރައިޓަން އިން ނޮރިޗް ސިޓީ ބަލިކުރީ 4-0 އިންނެވެ.