އެފްއެސްއެމްގެ ތެލުގެ ވައްކަމުގެ މައްސަލައިގައި ފުލުހުންގެ ތަޙުޤީޤު އިތުރަށް ފުޅާ ކޮށްފިއެވެ.

މިދިޔަ އަހަރުގެ ފަހުކޮޅު ފެށުނު މި ތަޙުޤީޤުގެ ފުރަތަމަކޮޅުގައި 10 މީހަކާއި ދެ ގެއަކާއި ތެޔޮ އުފުލާ ދެ ބާޖެއް ބަލައި ފާސްކޮށްފައިވެއެވެ.

މީގެ އިތުރުން ފުލުހުންގެ ރެއިޑުތަކުގައި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުންތަކެއް ހޯދާފައިވާ ކަމަށްވެސް މިނިސްޓަރު އިހުސާން ފާހަގަކުރެއްވިއެވެ. މި މައްސަލަ ބަލަމުންދަނީ ހާއްސަ ފުލުހުންގެ ޓީމަކުންނެވެ.

އެނގިފައިވާ ގޮތުގައި، ތަޙުޤީޤުގައި ސަމާލުކަން ދެވިފައިވާ އެއް ފަރާތަކީ އެފްއެސްއެމްގެ ތެޔޮ ބާޖެއްގެ ކައްޕިއެކެވެ. ސޯޝަލްމީޑިއާގައި އޭރު އޭނާއާއި އެފްއެސްއެމްގެ ކުރީގެ މެނޭޖިންގ ޑައިރެކްޓަރާއި ދެމެދު ގުޅުން އޮންނަ ކަމަށް އަޑުތައް ފެތުރިފައި ވެއެވެ.

އެނގިފައިވާ ގޮތުގައި އޭނާގެ މުސާރައަށް ލިބޭ 35,000 ރުފިޔާ އާއި ނުބައްދަލު އެތްއް ގުނައެއްގެ އިތުރު ޢަދަދެއް އޭނާގެ އެކައުންޓުން ވަނީ ރޯލް ވެފައެވެ.

އިތުރަށް ލިބުނު މަޢުލޫމާތުގައިވާ ގޮތުން، ތެޔޮ ވިއްކައިގެން ލިބުނު ފައިސާއިން އަގުބޮޑު މުދާ ވެސް އެ ކައްޕި ގަނެފައިވާ ކަމަށް ތުހުމަތު ކުރެވެއެވެ. މީގެ ތެރޭގައި އެސްޓީއޯ މުވައްޒަފުންނަށް ތަރައްޤީކުރި ފްލެޓުން 1.8 މިލިއަން ރުފިޔާއަށް ގަތް އެޕާޓްމަންޓެއް ހިމެނެއެވެ. މި އަދަދު ދައްކާފައިވަނީ އެއްފަހަރާ ނަގުދު ފައިސާއިންނެވެ.

މި މައްސަލައިގައި މިހަތަނަށް ފުލުހުން އެ ކައްޕިއާއި ގުޅޭ އެއްވެސް މަޢުލޫމާތެއް އަދި މީޑިއާއާއި ހިއްސާ ކޮށްފައި ނުވާއިރު، އެނގިފައިވާ ގޮތުގައި ފުލުހުން ދަނީ އޭނާއާއި އެކަމުގައި ބައިވެރިވި އެހެން ފަރާތްތައް ހޯދައި ބަލަމުންނެވެ.

އެފްއެސްއެމް އަކީ ތެލުން ވައްކަން ކުރުމުގެ ދިގު ތާރީޚެއް އޮތް ކަމަށް ތުހުމަތު ކުރެވޭ ކުންފުންޏެކެވެ. މެނޭޖްމެންޓަށް ނޭނގި ތެޔޮ ބޯޓުތަކުގައި އުޅޭ ފަޅުވެރިންނާއި ކައްޕިން ގުޅިގެން ތެލުން ވައްކަންކުރާތާ ވަރަށް ޒަމާން ވެފައިވާކަން އެނގިފައި ވެއެވެ. މެނޭޖްމެންޓަށް އެކަންތައްތައް ޝައްކު ކުރެވިގެން ގިނަ ބަޔަކު އެކި ދުވަސްވަރުމަތިން ކަނޑާލާފައި ވެސް ވެއެވެ.