ނާސާގެ އުޅަނދެއް އިރާ އެންމެ ކައިރިއަށް ދަތުރުކޮށް ކާމިޔާބުކޮށްފި

ނާސާއިން އިރާ އެންމެ ކައިރިއަށް ފޮނުވި އުޅަނދު "ދަ ޕާކާ ސޯލާ ޕްރޯބް" އޭގެ މިޝަން ކާމިޔާބުކޮށްފިއެވެ. މިއީ މިހާތަނަށް އެއްވެސް އުޅަނދަކަށް އިރާ މިހާ ކައިރިއަށް ދެވުނު ފުރަތަމަ ފަހަރެވެ.

ޑިސެމްބަރު 28 ވަނަ ދުވަހު ނާސާގެ އުޅަނދު ވަނީ އިރާ 6.1 މިލިއަން ކިލޯމީޓަރާ ހަމައަށް ދަތުރުކޮށްފައެވެ. މި ދަތުރުގައި އުޅަނދަށް އެއްވެސް ގެއްލުމެއް ލިބިފައިނުވާކަމަށް ނާސާގެ އޮފިޝަލުން މަޢުލޫމާތު ދީފައިވެއެވެ.

އުޅަނދު ރައްކާތެރިކުރުމަށްޓަކައި 11.5 ސެންޓިމީޓަރު (4.5 އިންޗި) ބޯ ކާބަން ކޮމްޕޮޒިޓް ޝީލްޑެއް ބޭނުންކޮށްފައިވާކަމަށް ނާސާއިން ހާމަކޮށްފައިވެއެވެ. އަދި އުޅަނދުގެ ސްޓްރެޓެޖީއަކީ އަވަހަށް އިރާ ކައިރިކޮށްފައި ނުކުތުން ކަމަށްވެސް ބުނެފައިވެއެވެ.

މި ދަތުރުގައި އުޅަނދު އިރާ ކައިރިވިއިރު އެ ސަރަޙައްދުގެ ހޫނުމިން ހުރީ 982 ޑިގްރީގައި ކަމަށް ނާސާއިން ހާމަކޮށްފައިވެއެވެ. އަދި މި ދަތުރުގައި އިރާ ގުޅޭ ގިނަ މުހިންމު މަޢުލޫމާތުތަކެއް އެއްކުރެވިފައިވާ ކަމަށްވެސް އޮފިޝަލުން ބުނެފައިވެއެވެ.

އުޅަނދުން އެއްކުރެވުނު މަޢުލޫމާތުތައް ފުރިހަމަކޮށް ދުނިޔެއަށް ފޮނުވާނީ އަންނަ މަހުގެ އެއްވަނަ ދުވަހު ކަމަށް ނާސާއިން ބުނެފައިވެއެވެ.