ސްޓާލައިނަރ އައިއެސްއެސް އިން ފަޅުވެރިންނާއި ނުލައި ދުނިޔެއަށް ގެނައީ ކޮންޓްރޯލްޑް ލޭންޑިންގ އަކުން. (ވީޑިއޯ ސްކްރީންޝޮޓް)
މައްސަލަ ޖެހުނު ބޮއިންގްގެ ސްޓާލައިނާ އެސްޓްރޮނޯޓުންނާއި ނުލައި ނިއު މެކްސިކޯގެ ވައިޓް ސޭންޑްސް ސްޕޭސް ހާބަރަށް ކާމިޔާބުކަމާއެކު ޖައްސާލައިފި އެވެ.
މިއަހަރުގެ ޖޫން 5ވަނަ ދުވަހު ނާސާގެ އެސްޓްރޮނޯޓުން ކަމަށްވާ ސުނީތާ ވިލިއަމްސް އާއި ބުޗް ވިލްމޯއާ އެކު ފޮނުވާލި މި ޖައްވީ އުޅަނދު ދިޔައީ 8 ދުވަހުގެ ތަހުލީލަކަށެވެ. ނަމަވެސް އައިއެސްއެސްގައި ބަނދަރު ކުރިތާ މާގިނައިރުތަކެއް ނުވެ ހީލިއަމް ލީކުވުމާއި ތްރަސްޓާގެ މައްސަލަތައް ހިމެނޭ ގޮތަށް ސަލާމަތީ މައްސަލަތަކެއް އުޅަނދަށް ދިމާވެ ، ބޮޑެތި ކަންބޮޑުވުންތަކާއި ކުރިމަތިލާން ޖެހުނެވެ.
އެގޮތުން ގިނަ މަޝްވަރާތަކެއް ކުރުމަށްފަހު އެންމެ ފަހުން ނާސާއިން ނިންމީ އެސްޓްރޮނޯޓުންނާއި ނުލައި އުޅަނދު ދުނިޔެއަށް ގެންނާށެވެ. އެސްޓްރޮނޯޓުން ބަލާ ސްޕޭސް އެކްސް ކްރޫ ޑްރެގަން ފޮނުވާށެވެ.
އެމީހުންނަށް އެންމެ އަވަހަށް ވެސް އާދެވޭނީ 2025 ވަނަ އަހަރުގެ ފެބްރުއަރީ މަހު އެވެ. ނާސާގެ އެޑްމިނިސްޓްރޭޓަރު ބިލް ނެލްސަން ވިދާޅުވީ ، ސްޕޭސްއެކްސްގެ ކްރޫ ޑްރެގަންގައި އެ ދެމީހުން ދުނިޔެއަށް ގެނެސް، މި ޓެސްޓުން ލިބޭ ޑޭޓާ ނާސާ އާއި ބޮއިންގުން ބޭނުންކުރާނެ ކަމަށެވެ. އެއަށްފަހު މައްސަލަތައް ހައްލުކޮށް ކުރިއަށް އޮތްތަނުގައި ފަޅުވެރިންގެ މިޝަންތަކަށް ސްޓާލައިނާ ތަރައްގީ ކުރާނެ ކަމަށެވެ.
ބޮއިންގް އާއި ނާސާ އަކީ ސީއެސްޓީ-100 ސްޓާލައިނަރ ޖައްވީ އުޅަނދު އުފެއްދުމުގެ ބައިވެރިންނެވެ. ސްޓާލައިނަރަކީ އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް އެސްޓްރޮނޯޓުން ގެންދިއުމާއި އައުމަށް ނާސާގެ ކޮމާޝަލް ކްރޫ ޕްރޮގްރާމްގެ ބައެކެވެ. މި ދަތުރުފަތުރުގެ ހިދުމަތްތައް ފޯރުކޮށްދިނުމަށް ނާސާއިން ހޮވާފައިވާ ސްޕޭސްއެކްސްއާ އެކު ބޮއިންގް އަކީ އަމިއްލަ މައިގަނޑު ދެ ކުންފުންޏެވެ. މި ޕާޓްނަޝިޕްގައި ބޮއިންގް އިން ސްޓާލައިނަރ ޖައްވީ އުޅަނދު ޑިޒައިންކޮށް، ބިނާކޮށް، އޮޕަރޭޓް ކުރަނީ ނާސާގެ ބެލުމުގެ ދަށުންނާއި ކޮންޓްރެކްޓް އެއްބަސްވުންތަކުގެ ދަށުންނެވެ.
