ބެލޮންޑިއޯ އެވޯޑް ހައްގީ ރެއާލް މެޑްރިޑްގެ ތަރި ފޯވާޑް ވިނިސިއަސް ޖޫނިއާ އަށް ކަމަށް ޑިސެމްބަރު 28، 2024 ގައި ދުބާއީގައި ބޭއްވި ގްލޯބް ސޮކާ އެވޯޑްސްގެ ތެރޭގައި ކްރިސްޓިއާނޯ ރޮނާލްޑޯ ބުނެފިއެވެ.

ވިނީޝިއަސް އަށް ނުދިން އެ އެވޯޑް މެންޗެސްޓާ ސިޓީގެ ރޮޑްރީއަށް ދިނުމަށް ނިންމުމަކީ "ނާއިންސާފު" ނިންމުމެއް ކަމަށް ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ ކަމަށް ގިނަ ބަޔަކު ޤަބޫލުކުރާ ރޮނާލްޑޯ ބުންޏެވެ.

ސްޓޭޖުގައި ވާހަކަ ދައްކަމުން ފަސް ފަހަރު ބެލޮންޑިއޯ ހާސިލްކޮށްފައިވާ ކުޅުންތެރިޔާ ބުނީ، “ވިނިސިއަސް އަށް ބެލޮންޑިއޯ ހައްގީ… ރޮޑްރީއަށް ދިނުން ނާއިންސާފު.،. އެންމެންގެ ކުރިމަތީގައި މިބުނަނީ.”

ރޮނާލްޑޯގެ ވާހަކަތަކާ ގުޅިގެން ފުޓްބޯޅައިގެ އެންމެ ގިނަ ބަޔަކު އުންމީދުކުރާ އިންޑިވިޖުއަލް ޝަރަފު ހޮވުމުގައި ބޭނުންކުރާ މިންގަނޑުތަކާ ބެހޭ ގޮތުން މަޝްވަރާތައް ވަނީ އަލުން ފަށާފަ އެވެ.

ރެއާލް މެޑްރިޑާއެކު މޮޅު ސީޒަނެއް ހޭދަކުރި ވިނިސިއަސް ޖޫނިއާ ވަނީ 39 މެޗުން 24 ގޯލް ޖަހައި، އެ ކްލަބުގެ ލަލީގާ އަދި ޔޫއެފާ ޗެމްޕިއަންސް ލީގު ކާމިޔާބުކުރުމުގައި މުހިންމު ދައުރެއް އަދާކޮށްފައެވެ. ކާމިޔާބީތަކެއް ހޯދި ނަމަވެސް ބެލޮންޑިއޯ އެވޯޑް ލިބުނީ މެންޗެސްޓާ ސިޓީން ޖެހިޖެހިގެން ހަތަރު ވަނަ ފަހަރަށް ޕްރިމިއާ ލީގު ޗެމްޕިއަންކަން ހޯދައި ސްޕެއިން ޔޫރޯ 2024 ކާމިޔާބުކުރުމުގައި މުހިންމު ދައުރެއް އަދާކުރި ރޮޑްރީ އަށެވެ.

ބެލޮންޑިއޯ ހަފްލާގައި ބައިވެރި ނުވެ ރެއާލް މެޑްރިޑުން ހިތްހަމަނުޖެހުން ފާޅުކޮށް، އެ ނިންމުމާ ގުޅިގެން އުފެދުނު މައްސަލަތައް އިތުރުވެގެން ދިޔައެވެ.