މި މަސް ނިމުމުގެ ކުރިން ދެމިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރާނެ ކަމަށް ލަފާކުރެވޭ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުޙައްމަދު ވިދާޅުވެއްޖެއެވެ. އޭނާ މިހެން ވިދާޅުވީ މިއަދު ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކާއި ވާހަކަ ދައްކަވަމުންނެވެ. އަދި މި ލަނޑުދަނޑި ހާސިލުކުރެވެނީ ދާއިރާގައި މަސައްކަތްކުރާ އެންމެންގެ މަސައްކަތުން ކަމަށް ފާހަގަކުރެއްވިއެވެ.

މި ބައްދަލުވުމުގައި މިނިސްޓްރީ އޮފް ޓުއަރިޒަމް، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ)، މޯލްޑިވްސް އެސޯސިއޭޝަން ޓްރެވަލް އިންޑަސްޓްރީ (މަޓީ)، ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އަދި މޯލްޑިވްސް ޔޮޓް އެސޯސިއޭޝަން (މާޔާ) ގެ އިތުރުން އެމްއޭސީއެލްގެ އިސްވެރިންނާއި ރާއްޖޭގައި އޮޕަރޭޓްކުރާ އެއަރލައިންތަކުގެ މަންދޫބުން ބައިވެރިވެވަޑައިގެންނެވިއެވެ.

އިތުރު އެއަރލައިންތަކާއި ރޫޓުތައް އަދި ކާގޯ ރޫޓުތައް އިތުރުކޮށްގެން ކަނެކްޓިވިޓީ ހަރުދަނާކުރުމަށް ކުރެވެމުންދާ މަސައްކަތްތަކުގެ މައްޗަށްވެސް ސީއީއޯ ޝަރީފް އަލިއަޅުއްވާލެއްވިއެވެ. އަދި ރާއްޖޭގެ ފަތުރުވެރިކަމާއި ވައިގެ ޚިދުމަތަށް ލިބޭ ކުރިއެރުމަކީ ދެ ދާއިރާ ހިއްސާވާ ކާމިޔާބީއެއްކަން ފާހަގަކުރެއްވިއެވެ.

ޝަރީފް ވިދާޅުވީ ކުރިއަށް އޮތް ތަނުގައި ދެ ދާއިރާގެ ކުރިއެރުންވެސް ބިނާވެފައިވަނީ ދެމެހެއްޓެނިވި އެއްބާރުލުމާއި ހަރުދަނާ ޕާޓްނަރޝިޕްގެ މައްޗަށެވެ. އަދި ހުރިހާ ފަރާތްތަކުން ވެސް ކުރާ މަސައްކަތަށް ޝުކުރު އަދާކުރެއްވިއެވެ.

އިންފްރާސްޓްރަކްޗަރ އަޕްގްރޭޑްކުރުމާއި، އޮޕަރޭޝަންތައް ހަރުދަނާކޮށް، ޚިދުމަތް ފޯރުކޮށްދިނުން އިތުރުކުރުމަށް ޓަކައި ޓެކްނޮލޮޖީގެ އާ ޙައްލުތައް ހޯދުމުގެ މަސައްކަތް ކުރިއަށްދާ ކަމަށްވެސް ސީއީއޯ ޝަރީފް ފާހަގަކުރެއްވިއެވެ. މި މަސައްކަތްތަކުގެ މަޤްޞަދަކީ އޮޕަރޭޝަނަލް އެފިޝަންސީ އާއި ކަސްޓަމަރުންގެ ތަޖުރިބާ އިތުރަށް ހަރުދަނާކުރުން ކަމަށް އެމަނިކުފާނު ވިދާޅުވިއެވެ.

މި ބައްދަލުވުމުގައި ބައިވެރިވި ފަރާތްތަކުން ދާއިރާގެ ކުރިއެރުމަށް ގިނަ ޚިޔާލުތަކެއް ހުށަހަޅައި، މުހިންމު މަޝްވަރާތަކެއް ކުރެވުނު ކަމަށް އެމްއޭސީއެލްއިން ބުނެފައިވެއެވެ.