ކާބުލްގައި ހިނގި ބޮމުގެ ހާދިސާއެއްގައި އަފްޣާނިސްތާނުގެ ޠާލިބާން ސަރުކާރުގެ ރެފިއުޖީންނާބެހޭ ވަޒީރު ޚަލީލް ރަޙްމާން ޙައްޤާނީ ޝަހީދުވެއްޖެއެވެ. މި ހަމަލާގައި އިތުރު 6 މީހުން ވެސް މަރުވެފައިވެއެވެ. ޠާލިބާނުންގެ ފަރާތުން މަޢުލޫމާތު ދިން މީހަކު ބުނެފައިވަނީ މި ހަމަލާ ދިނީ ހަރުކަށި ޖަމާޢަތް އައިއެސްއިން ކަމަށެވެ.
2021 ގައި ޠާލިބާނުން އަލުން ވެރިކަމަށް އައުމާއެކު ޚަލީލް ރަޙްމާން ޙައްޤާނީ ރެފިއުޖީންނާބެހޭ ވަޒީރުކަމާ ޙަވާލުވިއެވެ. އޭނާއަކީ އެމެރިކާގެ އިޙްތިލާލާ ދެކޮޅަށް 20 އަހަރު ވަންދެން ކުރި ހަނގުރާމައިގައި މުހިންމު ދައުރެއް އަދާކުރި ޙައްޤާނީ ނެޓްވޯކުގެ އިސް މެންބަރެކެވެ.
58 އަހަރުގެ ޚަލީލް ރަޙްމާން ޙައްޤާނީ ޝަހީދުވީ އިއްޔެ މެންދުރު ނަމާދަށްފަހު ކާބުލްގެ މިސްކިތަކުން ނުކުތްއިރު ގޮއްވާލި ބޮމަކުންނެވެ. މީގެ ކުރިން ވެސް އައިއެސްއިން ވަނީ އަފްޣާނިސްތާނުގެ ޠާލިބާން ސަރުކާރުގެ ދާޚިލީ ވަޒީރު އަދި ޙައްޤާނީ ނެޓްވޯކުގެ އިސްވެރިޔާ ސިރާޖުއްދީން ޙައްޤާނީއަށް އަމާޒުކޮށް ބޮމުގެ ހަމަލާތަކެއް ދީފައެވެ.
އެމެރިކާއިން ވަނީ ޚަލީލް ރަޙްމާން ޙައްޤާނީ ހައްޔަރުކުރުމަށް އެހީތެރިވާ ފަރާތަކަށް 5 މިލިއަން އެމެރިކާ ޑޮލަރުގެ އިނާމެއް ހުށަހަޅާފައެވެ.
