ޔުވެންޓަސްގެ މިޑްފީލްޑަރު ޑަގްލަސް ލުއިޒް އިއްޔެ ޓީމުގެ އެހެން ކުޅުންތެރިންނާއެކު ތަމްރީނަށް ނުކުމެ، ބުދަ ދުވަހު ކުޅޭ ޗެމްޕިއަންސް ލީގުގެ މުހިންމު މެޗަށް ތައްޔާރުވުމުގެ މަސައްކަތް ފަށައިފިއެވެ.
އަނިޔާގެ ސަބަބުން މިދިޔަ 10 މެޗުގައި ނުކުޅެވި ހުރި ލުއިޒް، މެންޗެސްޓަރ ސިޓީއާ ދެކޮޅަށް ކުޅޭ މެޗަށް ތައްޔާރުވަމުންދާކަން ޔުވެންޓަސްގެ ރިޕޯޓަރު ރޮމިއޯ އަގްރެސްޓީ ވަނީ ހާމަކޮށްފައެވެ.
Advertisement
މިދިޔަ އަހަރުގެ ކުރީކޮޅު އެސްޓަން ވިލާއިން 50 މިލިއަން ޔޫރޯއަށް ގަނެފައިވާ 26 އަހަރުގެ ބްރެޒިލް ކުޅުންތެރިޔާ އަށް މިހާތަނަށް ޔުވެންޓަސްގައި ގޯލެއް ނުޖެހެއެވެ. ނަމަވެސް ލުއިޒް ޔުވެންޓަސްގައި ދެމިހުރެ، އޭނާގެ ޤާބިލުކަން ސާބިތުކޮށްދޭން ބޭނުންވާކަމަށް އިޓަލީގެ ނޫސް "ޓުޓޯސްޕޯޓް" އިން ވަނީ ރިޕޯޓުކޮށްފައެވެ.
ޔުވެންޓަސްގެ ކޯޗު ތިއާގޯ މޮޓާ އަށް މި ޚަބަރަކީ އުފާވެރި ޚަބަރެކެވެ. ސަބަބަކީ ބުދަ ދުވަހު އެލިއަންޒް ސްޓޭޑިއަމްގައި ކުޅޭ މެޗަކީ ޔުވެންޓަސްއަށް ވަރަށް މުހިންމު މެޗަކަށްވާތީއެވެ. މި މެޗުން މޮޅުވެއްޖެނަމަ ޔުވެންޓަސް އަށް ޗެމްޕިއަންސް ލީގުގެ ނޮކްއައުޓް ބުރަށް ދިއުމުގެ ފުރުސަތު ބޮޑުވެގެންދާނެއެވެ.
