ފީފާ ކުލަބު ވޯލްޑް ކަޕްގެ އެންމެ ފަހުގެ ޗެމްޕިއަން މެންޗެސްޓަރ ސިޓީ އިޓަލީ ސެރީ އޭގެ ހަވަނައިގައި މިވަގުތު އޮތް ޔުވެންޓަސް އާއި އެއް ގްރޫޕެއްގައި ހިމެނިއްޖެ އެވެ. 

ގިނަ އަހަރު ތަކަކަށްފަހު މުޅިން އައު ފޯމެޓަކަށް ކުރިއަށް އޮތް ފީފާ ކްލަބް ވޯލްޑް ކަޕް މުބާރާތް ބަދަލުކޮށްފައިވާއިރު މި ފަހަރުގެ މުބާރާތުގައި 32 ޓީމު ވާދަކުރާނެ އެވެ. އަންނަ އަހަރުގެ ޖޫން 15 އިން ޖުލައި 13 އަށް އެމެރިކާގައި ކުރިއަށްދާ މި މުބާރާތުގެ ފުރަތަމަ މެޗުގައި ބައްދަލު ކުރާނީ ގުރޫޕް އޭ ގެ އެމެރިކާގެ އިންޓަރ މަޔާމީ އާއި މިސްރުގެ އަލް އަހުލީ އެވެ. 

ގްރޫޕް ސްޓޭޖުގައި ކޮންމެ ޓީމެއްވެސް ތިން މެޗު ކުޅޭނެ އެވެ. އެންމެ ފަހުގެ ޗެމްޕިއަން މެންޗެސްޓަރ ސިޓީ ހިމެނޭ ގްރޫޕް ޖީ ގައި ދެން ހިމެނެނީ ޔުވެންޓަސްގެ އިތުރުން މޮރޮކޯގެ ވައިދާދް އާއި ޔޫއޭއީގެ އަލް އައިން އެވެ. 

ސްޕެއިން އެތްލެޓިކޯ މެޑްރިޑް އާއި ފްރާންސްގެ ޕީއެސްޖީގެ އިތުރުން މެކްސިކޯގެ ބޮޓަފޮގޯ އަދި އެމެރިކާގެ ސިއޭޓަލް ސައުންޑާސް ގްރޫޕް ބީ ގައި ހިމެނިފައިވާއިރު، 2021 ވަނަ އަހަރުގެ ކްލަބް ވޯލްޑް ކަޕް ހޯދި ޗެލްސީ ހިމެނިފައިވާ ގްރޫޕް ޑީ ގައެވެ. މި ގްރޫޕްގައި ދެން ހިމެނެނީ މެކްސިކޯގެ ލިއޯން އާއި ޓިއުނީޝިއާގެ އެސްޕެރަންސޭ އާއި ބްރެޒިލްގެ ފްލެމިންގޯ އެވެ. 

މި މުބާރާތުގައި ހިމެނޭ 32 ޓީމުގެ ތެރެއިން 12 ޓީމަކީ ޔޫރަޕްގެ ޓީމުތަކެވެ. ޔޫރަޕުން މި މުބާރާތުގައި ވާދަކުރާ ޓީމުތައް ފައިނަލް ކޮށްފައިވަނީ ފާއިތުވެދިޔަ ހަތަރު އަހަރުގެ ތެރޭގައި ޔޫއެފާ ޗެމްޕިއަންސް ލީގުގައި ދައްކާފައިވާ ކުޅުމަށް ބެލުމަށްފަހުގަ އެވެ. 

މި ދެޓީމު އެންމެ ފަހުން ބައްދަލުކުރީ ޗެމްޕިއަންސް ލީގުގައި 2015 ވަނަ އަހަރު ނޮވެމްބަރު 25 ވަނަ ދުވަހުއެވެ. އެ މެޗު ކާމިޔާބުކުރީ ޔުވެންޓަސް އިންނެވެ. އަދި އޭގެ ކުރިން ސެޕްޓެމްބަރު 15 ގައި ކުޅުނު މެޗުން ވެސް ސިޓީ ވަނީ ބަލިވެފައެވެ. އެފަހަރު ސިޓީގެ މައްޗަށް ޔުވެންޓަސް ކުރި ހޯދީ 1-2 ލަނޑުންނެވެ.