ކެވިން ޑި ބްރޭނާއާ ދެމެދު އެއްވެސް މައްސަލައެއް ނެތް ކަމަށް މެންޗެސްޓަރ ސިޓީގެ މެނޭޖަރު ޕެޕް ގުއާޑިއޯލާ ބުނެފިއެވެ.

އެ ދެމީހުންގެ ދެމެދުގައި މައްސަލަތަކެއް އުޅޭކަމުގެ އަޑުތަކެއް ފެތުރިފައިވާއިރު. ބެލްޖިއަމްގެ މިޑްފީލްޑަރު ޑި ބްރޭނާއަކީ މި ސީޒަނުގައި ވެސް އަނިޔާ ތަކާއި ކުރިމަތިލާންޖެހުނު ކުޅުންތެރިއެކެވެ. 2024-25 ވަނަ އަހަރުގެ ޕްރިމިއަރ ލީގުގައި ގާޑިއޯލާގެ ފުރަތަމަ އެގާރައިގެ ތެރޭގައި އޭނާ ހިމެނިފައިވަނީ އެންމެ ހަތަރު މެޗުގައެވެ.

ބަނޑުގެ މައްސަލައެއްގެ ސަބަބުން އަށް ހަފްތާއަށް ނުކުޅެވި ހުރުމަށްފަހު އެނބުރި އައި ފަހުން، ގާޑިއޯލާ ޑި ބްރޭނާ އަށް ފުރުސަތު ދިނީ އެންމެ ފަސް މެޗުގައެވެ. އެއީވެސް ބަދަލުކުޅުންތެރިއެއްގެ ގޮތުގައި ޖުމްލަ 72 މިނެޓަށެވެ.. އޭގެ ތެރެއިން އެންފީލްޑުގައި އާދީއްތަ ދުވަހު ކުޅުނު މެޗުގައި އޭނާއަށް ކުޅެވުނީ އެންމެ 12 މިނެޓެވެ. އެ މެޗުގައި ލިވަޕޫލް ވަނީ 2-0 އިން މޮޅުވެފައެވެ.

މި މެޗުގެ ސްކައި ސްޕޯޓްސްގެ ކަވަރޭޖުގައި ޖޭމީ ކެރަގަރާއި ގެރީ ނެވިލް ވެސް ވަނީ ގާޑިއޯލާ އާއި ޑި ބްރޭނާ އާ ދެމެދު "މައްސަލަތަކެއް އުޅޭކަން ފާހަގަ ކޮށްފައެވެ.

"މީހުން ބުނަނީ އަހަރެންނާއި ކެވިންއާ ދެމެދު މައްސަލައެއް އުޅޭ ކަމަށް. ކެވިން ނުކުޅުވައި ބެހެއްޓުމަކީ އަހަރެން ބޭނުންވާ ކަމެއް ކަމަށް ކަލޭމެންނަށް ހީވޭތަ؟ އެންމެ ހުނަރުވެރި ކުޅުންތެރިޔާ ނުކުޅުވައި ބެހެއްޓުން އެއީ އަހަރެން ބޭނުންވާ ކަމެއްތަ؟ ނުވަ އަހަރު އެކުގައި މަސައްކަތްކުރުމަށްފަހު އަހަރެންނާއި އޭނާއާ ދެމެދު ޕަރސަނަލް މައްސަލައެއް އުޅޭ ކަމަށް ކަލޭމެނަށް ހީވޭތަ؟" ގުއާޑިއޯލާ ބުނެފައިވެއެވެ.

"އޭނާވަނީ މި ކްލަބަށް އެންމެ ބޮޑު ކާމިޔާބީތައް ހޯދައިދީފައި. އަހަރެން ބޭނުންވަނީ އޭނާގެ އެންމެ ރަނގަޅު ފޯމު ފެންނާށް. އެކަމަކު އޭނާ ފަސް މަސް ދުވަހު އަނިޔާގައި ހުރި. އަދި ދެ މަސް ދުވަހު އަނިޔާގައި ހުރި. އޭނާގެ އުމުރަކީ 33 އަހަރު. އެންމެ ރަނގަޅު ފޯމު ހޯދުމަށް އޭނާއަށް ވަގުތު ބޭނުންވޭ."

ޑި ބްރޭނާއަށް 2023-24 ވަނަ އަހަރުގެ އޯގަސްޓް މަހުން ޖެނުއަރީ މަހާ ހަމައަށް ނުކުޅެވި ހުންނަން ޖެހުނީ 2023 ވަނަ އަހަރުގެ ޗެމްޕިއަންސް ލީގު ފައިނަލުގައި އިންޓަރ މިލާނާ ދެކޮޅަށް ކުޅުނު މެޗުގައި ފައިގެ މަސްގަނޑަށް ޖެހުނު މައްސަލައެއްގެ ސަބަބުންނެވެ.

"އަހަރެން ވަރަށް ބޭނުން ކެވިން އެންމެ ރަނގަޅު ފޯމުގައި، 26 ނުވަތަ 27 އަހަރުގައި ހުރި ވަރަށް ހުރުން. އޭނާ ވެސް އެކަން ބޭނުންވާނެ. އެކަމަކު އޭނާގެ އުމުރަކީ މިހާރު 26 ނުވަތަ 27 އަހަރެއް ނޫން…އޭނާއަކީ ޖާގައާއި ހަކަތަ ބޭނުންވާ ގޮތަށް ޖިސްމާނީ ގޮތުން ފިޓްވާންޖެހޭ މީހެއް،" ގުއާޑިއޯލާ ބުނެފައިވެއެވެ.

 މި އަހަރުގެ ނިޔަލަށް އޭނާގެ ކޮންޓްރެކްޓް ހަމަވާއިރު، އައު ކޮންޓްރެކްޓަކާ ގުޅޭ މަޝްވަރާތައް އަދި ފެށިފައިނުވާ ކަމަށް ޑި ބްރޭނާ ބުނެފައިވެއެވެ. މިވަގުތު އޭނާ އަމާޒު ހިފާފައިވަނީ ފިޓްނަސް ހޯދުމަށެވެ.