މިއަދުން ފެށިގެން ރާއްޖޭގެ އެއާޕޯޓުތަކުން ބޭރަށް ފުރާ ފަސިންޖަރުންގެ އަތުން ނަގާ އެއާޕޯޓު ޑިވެލޮޕްމެންޓް ފީ (އޭޑީއެފް) އާއި ޑިޕާޗާ ޓެކްސް ބޮޑުކޮށްފިއެވެ. މިއީ ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާއި ބެހޭ ގޭ ގާނޫނަށް ގެނައި އިސްލާހަކާއި ގުޅިގެން ގެނެވުނު ބަދަލެކެވެ.
މި ބަދަލާއި އެކު، އިކޮނޮމީ ކްލާހުގައި ރާއްޖެއިން ބޭރަށް ދަތުރުކުރާ ދިވެހިންގެ އަތުން ނަގާ ޓެކްސްއަށް ބަދަލެއް ނައި ނަމަވެސް، ބިދޭސީންގެ އަތުން ނަގަމުން އައި 30 ޑޮލަރުގެ ބަދަލުގައި މިހާރު ނަގާނީ 50 ޑޮލަރެވެ. ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގާ ފީ 60 ޑޮލަރުން 120 ޑޮލަރަށް ބޮޑުވެފައިވާއިރު، ފަސްޓް ކްލާހުގައި ދަތުރުކުރާ މީހުންގެ އަތުން ނަގާ ފީ 90 ޑޮލަރުން 240 ޑޮލަރަށް އިތުރުވެފައިވެއެވެ.
އެންމެ ބޮޑު ބަދަލެއް އައިސްފައިވަނީ ޕްރައިވެޓް ޖެޓުގައި ދަތުރުކުރާ ފަރާތްތަކަށެވެ. މިގޮތުން، ކުރިން 120 ޑޮލަރު ނަގަމުން އައި ތަނުގައި މިހާރު ނަގާނީ 480 ޑޮލަރެވެ. މިއީ 300 ޕަސެންޓުގެ އިތުރުވުމެކެވެ.
މި ބަދަލުތަކާއި ގުޅިގެން މިއަދުން ފެށިގެން ދަތުރުކުރާ ފަރާތްތަކުގެ ޓިކެޓުން މި އަދަދުތައް ޗާޖުކުރަން ފަށާނެ ކަމަށް މީރާއިން ވަނީ އިއުލާންކޮށްފައެވެ. ޑިޕާޗާ ޓެކްސްގެ ގޮތުގައި ލިބޭ ފައިސާ ބޭނުންކުރާނީ ޤައުމުގެ ރިޒާވް އިތުރުކުރުމަށެވެ. އަދި އެއާޕޯޓް ޑިވެލޮޕްމެންޓް ފީ އަށް އިތުރުވާ އަދަދު ޖަމާކުރާނީ މިހާރެކޭ އެއްގޮތަށް ސޮވަރިން ޑިވެލޮޕްމެންޓް ފަންޑަށެވެ.
ސަރުކާރުގެ ޕްލޭނަކީ ޢާންމު ރައްޔިތުންގެ އަތުން ނަގާ ޖީއެސްޓީ ބޮޑު ނުކޮށް އިޤްތިޞާދު ފުޅާ ކުރުމެވެ. ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި، މި ބަދަލުތަކުގެ ސަބަބުން ދިވެހި ރައްޔިތުންގެ އަތުން ނެގޭ ޖީއެސްޓީއަކަށް ބަދަލެއް ނައިސް އިޤްތިޞާދު ފުޅާ ވާނެއެވެ. ފިނޭންސް މިނިސްޓްރީގެ އަންދާޒާގައި، މި ބަދަލުތަކާއި ގުޅިގެން ދައުލަތުގެ އާމްދަނީއަށް 1.5 ބިލިއަން ރުފިޔާ އިތުރުވާނެ ކަމަށް ލަފާކުރެވެއެވެ.
