ހުޅުމާލެ ބްރިޖް ޗެނަލުގައި މޫދު ކަސްރަތުކުރާ މީހުންނަށް ފެންވަރާނެ ތަނެއް ބޭނުންވާކަން ފާހަގަކުރެވި، އެކަން ޙައްލުކުރުމަށް އަވަސް ފިޔަވަޅުތަކެއް އަޅައިފިކަމަށް ރައްޔިތުންގެ މަޖިލީހުގެ ހުޅުމާލެ މެދު ދާއިރާގެ މެންބަރު އަބްދުﷲ ޝަޒީމް ވިދާޅުވެއްޖެއެވެ.
ޝަޒީމް ވިދާޅުވިގޮތުގައި، މި މައްސަލަ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ފަޒުލް ރަޝީދުގެ ސަމާލުކަމަށް ގެނައުމާއެކު، ވަރަށް އަވަހަށް އެކަން ހައްލު ކޮށްދެއްވައި، މިހާރު ވަނީ މޫދު ކަސްރަތުކުރާ މީހުންނަށް ފެންވެރޭނެ ނިޒާމު ހަމަޖައްސަވައި ދެއްވާފައެވެ. އެކަމަށްޓަކައި އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދަށް ޝަޒީމް ޝުކުރު އަދާކުރެއްވިއެވެ.
"ހުޅުމާލެ ބްރިޖް ޗެނަލަށް މޫދު ކަސްރަތަށްދާ ދައްތަމެންނަށް ފެންވަރާނެ ތަނެއް ބޭނުންވާ ވާހަކަ އެޗްޑީސީގެ އެމްޑީ ފަޒުލް ރަޝީދު އަރިހުގައި ދެންނެވުމުން މަހެއް ނުވަނީސް ނިންމާ ދައްތަމެންނާއި މިހާރު ޙަވާލު ކޮށްފި،" ޝަޒީމް ވިދާޅުވިއެވެ.
މި ޚިދުމަތް ފޯރުކޮށްދިނުމުގައި އެޗްޑީސީން ދެއްކި އަވަސް އަދި ހަރުދަނާ މަސައްކަތް، މޫދު ކަސްރަތުކުރާ ދައްތަމެންގެ ފަރާތުން ވަރަށް ބޮޑަށް ފާހަގަކޮށް، ޝަޒީމް ވަނީ ޝުކުރު އަދާކޮށްފައެވެ.
މި އައު ވަސީލަތް ޤާއިމްކުރެވުމާއެކު، ހުޅުމާލެ ބްރިޖް ޗެނަލުގައި މޫދު ކަސްރަތުކުރާ ފަރާތްތަކަށް އިތުރު ފަސޭހަތަކެއް ލިބި، އެ ސަރަޙައްދުގައި ކުރާ ހަރަކާތްތައް އިތުރަށް ކުރިއަރައިގެންދާނެއެވެ. މިކަމުގެ ސަބަބުން، އެ ސަރަޙައްދުގައި މޫދު ކަސްރަތުކުރާ މީހުންގެ އަދަދު އިތުރުވެ، އާންމު ޞިއްޙަތަށް ފައިދާހުރި ހަރަކާތްތައް އިތުރުވެގެންދާނެ ކަމަށްވެސް ލަފާކުރެވެއެވެ.
ހުޅުމާލެ ބްރިޖް ޗެނަލުގައި މޫދު ކަސްރަތުކުރާ މީހުންނަށް އެޗްޑީސީން ޤާއިމްކޮށްދިން ފެންވަރާތަން - އެޗްޑީސީން ބޭނުންވަނީ ރައްޔިތުންގެ ހިތްހަމަޖެހުން.
