ދިވެހި ސަރުކާރުގެ ގެޒެޓުގައި ޝާއިޢުކުރުމަށް ފޮނުވާ ޤާނޫނީ ލިޔުންތައް (ޤަވާޢިދުތަކާއި، އުސޫލުތައް) ފޮނުވުމަށް ހަމަޖެހިފައިވާ ގޮތަށް ބަދަލު ގެނެސްފިއެވެ.

މި ބަދަލު ގެނެސްފައިވާކަން ހާމަކުރީ މިއަދު ރައީސް އޮފީހުން ނެރުނު ދެންނެވުމުގައެވެ.

ރައީސް އޮފީހުން ނެރުނު ދެންނެވުމުގައި ބުނީ، ދިވެހި ސަރުކާރުގެ ގެޒެޓުގައި ޝާއިޢުކުރުމަށް އެދި، ދައުލަތުގެ އެންމެހައި ވުޒާރާތަކާއި މުއައްސަސާތަކާއި އިދާރާތަކުން ފޮނުވާ ޤާނޫނީ ލިޔުންތައް އޮފީހަށް ފޮނުވުމުގައި ޢަމަލުކުރަމުން ގެންދާ ގޮތަށް، 24 ނޮވެންބަރު 2024 ވާ އާދީއްތަ ދުވަހުން ފެށިގެން ބަދަލު ގެނައުމަށް ނިންމާފައިވާ ކަމަށާއި، ދައުލަތުގެ އެންމެހައި ވުޒާރާތަކާއި މުއައްސަސާތަކާއި އިދާރާތަކުން، ދިވެހި ސަރުކާރުގެ ގެޒެޓުގައި ޝާއިޢުކުރުމަށް އެދި، ޤާނޫނީ ލިޔުންތައް ފޮނުވާނީ، legalaffairs@po.gov.mv  އީމޭލަށް ކަމަށް ދަންނަވަން ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެފައިވާކަމަށެވެ.

ރައީސް އޮފީހުން ބުނީ ގެޒެޓުގައި ޝާއިޢުކުރުމަށް ފޮނުވާ ލިޔުމެއްގައި އިޞްލާޙުކުރަންޖެހޭ ކަންކަން ހުރި ނަމަ، އެ ކަންކަން އިޞްލާޙުކުރުމަށްފަހު، ދިވެހި ސަރުކާރުގެ ގެޒެޓުގައި ޝާއިޢުކުރުމަށް އެންމެ ފަހުގެ ދެލިކޮޕީ ފޮނުވާއިރު، ދައުލަތުގެ އެކި ވުޒާރާތަކާއި އެ ވުޒާރާތަކުގެ ދަށުން ހިންގަމުންދާ މުއައްސަސާތަކާއި އިދާރާތަކުން ފޮނުވާނީ، ރައީސް އޮފީހުގެ ނަންބަރު 2015/4 (ރަސްމީ ލިޔުންތަކުގައި ސޮއިކުރެއްވުމާއި ސިޓީ އެޑްރެސްކުރެއްވުން) ދެންނެވުމުގައި، ރައީސް އޮފީހަށް ފޮނުވާ ލިޔުންތަކުގައި ސޮއިކުރުމާ ގުޅޭގޮތުން ބަޔާންކޮށްފައިވާ ގޮތަށް، އެ ވުޒާރާގެ ވަޒީރު ނުވަތަ އެ ވަގުތަކު އެ ވުޒާރާ ހިންގެވުމާ ހަވާލުވެވަޑައިގެން ހުންނެވި ބޭފުޅަކު ސޮއިކުރައްވައިފައިވާ ލިޔުމަކާއެކުގައި ކަމަށެވެ.

ދައުލަތުގެ އެކިއެކި ވުޒާރާތަކާއި އެ ވުޒާރާތަކުގެ ދަށުން ހިންގަމުންދާ މުއައްސަސާތައް ފިޔަވައި ދައުލަތުގެ އެހެން އިދާރާތަކާއި މުއައްސަސާތަކުން ދިވެހި ސަރުކާރުގެ ގެޒެޓުގައި ޝާއިޢުކުރުމަށް އެންމެ ފަހުގެ ދެލިކޮޕީ ފޮނުވާނީ ވެސް ރައީސް އޮފީހަށް ފޮނުވާ ލިޔުންތަކުގައި ސޮއިކުރުމާ ގުޅޭގޮތުން ހަވާލާދީފައިވާ ދެންނެވުމުގައި ބަޔާންކޮށްފައިވާ ގޮތަށް، އެ ތަނެއްގެ އެންމެ އިސްވެރިޔާ ނުވަތަ އެ ތަނެއް އެ ވަގުތަކު ހިންގެވުމާ ހަވާލުވެވަޑައިގެން ހުންނެވި ބޭފުޅަކު ސޮއިކުރައްވައިފައިވާ ލިޔުމަކާއެކުގައި، ދެންނެވުމުގައި ބަޔާންކޮށްފައިވާ އީމޭލަށް ކަމަށް ރައީސް އޮފީހުން ބުންޏެވެ.

މީގެ އިތުރުން، ގެޒެޓުގައި ޝާއިޢުކުރުމަށް، ޤާނޫނީ ލިޔުންތައް ފޮނުވާއިރު، ބަންޑާރަ ނައިބުގެ ޤާނޫނީ ލަފާ ހޯދަން ޖެހޭ ދައުލަތުގެ އިދާރާތަކުން އެ ލަފާ ހޯދައި، އެ ލަފައާއި އެއްގޮތަށް ޤާނޫނީ ލިޔުންތައް ތައްޔާރުކޮށް، ބަންޑާރަ ނައިބުގެ ޤާނޫނީ ލަފައާއި އެކު ފޮނުވުމަށާއި، އެ ލިޔުމަކާ ގުޅޭގޮތުން ރައީސް އޮފީހުގެ ފަރާތުން އެ ވުޒާރާއަކާ ނުވަތަ އެ މުއައްސަސާއަކާ ނުވަތަ އެ އިދާރާއަކާ މުޢާމަލާތުކުރާނެ ބޭފުޅެއްގެ ނަމާއި މަޤާމާއި ގުޅޭނެ ފޯނު ނަންބަރު އެނގޭ ގޮތަށް ފޮނުވަމުން ގެންދިއުމަށާއި، ޤާނޫނީ ލިޔުންތައް ފޮނުވާއިރު ބަހުގެ ހަމަތަކަށާއި ޤާނޫނީ ހަމަތަކަށް ރަނގަޅަށް ބަލައި ކުށް ފިލުވުމަށްފަހު، ދިވެހި ސަރުކާރުގެ ގެޒެޓުގައި ޝާއިޢުކުރާ ޤާނޫނީ ލިޔުންތައް ތައްޔާރުކުރާ ފޯމެޓުގައި ފޮނުވުމަށް ރައީސް އޮފީހުން ވަނީ ބުނެފައެވެ.

ދިވެހި ސަރުކާރުގެ ގެޒެޓުގައި ޝާއިޢުކުރުމަށް އެދި، ދައުލަތުގެ އެންމެހައި މުއައްސަސާތަކާއި އިދާރާތަކުން ފޮނުވާ ޤާނޫނީ ލިޔުންތައް ރައީސް އޮފީހަށް ފޮނުވުމުގައި ޢަމަލުކުރަމުން ގެންދާ ގޮތަށް ބަދަލު ގެނައި ކަމުގައި ވިޔަސް، ރައީސް އޮފީހުގެ ނަންބަރު 2010/11 (ސަރުކާރުގެ އޮފީސްތަކުންނާއި ދައުލަތުގެ އެކިއެކި މުއައްސަސާތަކުން ޤަވާޢިދު ހެދުން) ދެންނެވުމާއި، ރައީސް އޮފީހުގެ ނަންބަރު 2010/25 (ސަރުކާރުގެ އޮފީސްތަކުން ގެޒެޓްކުރުމަށް ޤަވާޢިދު ފޮނުވާއިރު، އެޓަރނީ ޖެނެރަލްގެ އޮފީހުގެ ލަފަޔާއެކު ފޮނުއްވުން) ދެންނެވުމަށް ބަދަލެއް ގެނެސްފައި ނުވާކަމަށް ރައީސް އޮފީހުން ބުންޏެވެ.