ބާސެލޯނާގެ ތަރި ޔަމާލްގެ ކަކުލަށް ލިބުނު އަނިޔާއާ ގުޅިގެން ސްޕެއިންގެ ޤައުމީ ޓީމުގެ ކޯޗް ލުއިސް ދެ ލަ ފުއެންޓެ ރިއެކްޓް ކޮށްފިއެވެ.

ލަސް ރޯޒާސްގައި އިއްޔެ ވާހަކަދައްކަމުން ދެ ލަ ފުއެންޓެ ބުނީ، ބާސެލޯނާއިން ފޮނުވި މެޑިކަލް ރިޕޯޓުތަކަށް ބަލާއިރު، ޔަމާލް މެޑްރިޑަށް ދަތުރުކުރުމުގެ ބޭނުމެއް ނެތްކަމަށް ނިންމާފައިވާ ކަމަށެވެ. އަދި އޭނާ އަވަހަށް ރަނގަޅުވުމަށް އެދޭ ކަމަށްވެސް ބުންޏެވެ.

"ހުރިހާ ކްލަބްތަކުން ވެސް ކުރާ ފަދައިން، ބާސެލޯނާއިން އަޅުގަނޑުމެންނަށް ކަމާގުޅޭ ޓެސްޓުތަކާއެކު ރިޕޯޓު ފޮނުވި. އަދި އަޅުގަނޑުމެން ދެކެނީ އޭނާ އަނެއްކާވެސް ދަތުރުކޮށް އެ ޕްރޮސެސް ތަކުރާރުކުރުމުގެ ބޭނުމެއް ނެތް ކަމަށް،" ދެ ލަ ފުއެންޓެ ބުންޏެވެ.

ބާސެލޯނާގެ ރިޕޯޓުގައިވާ ގޮތުން، ޔަމާލްގެ ކަނާތު ކަކުލުގެ ސިންޑެސްމޯސިސްއަށް އަނިޔާއެއް ލިބިފައިވާ ކަމަށާއި، މި އަނިޔާގެ ސަބަބުން 2-3 ހަފްތާއަށް އޭނާ ކުޅުމުން ދުރުގައި ހުންނަން ޖެހޭނެ ކަމަށް ބުނެފައިވެއެވެ.

ރިއޯޖަން ކޯޗު، ޔަމާލްގެ ބަދަލުގައި ބްރަޔަން ގިލް (ޖިރޯނާ) ވަނީ ސްކޮޑުގައި ހިމަނާފައެވެ. މި ސްކޮޑަކީ ކޯޕަންހޭގަންގެ ޕާކެން ސްޓޭޑިއަމްގައި ޑެންމާކާ އަދި ސަންތަ ކްރޫޒް ދެ ޓެނެރީފޭގެ ހެލިއޮދޯރޯ ރޮޑްޖި ރިގެޒް ލޯޕެޒް ސްޓޭޑިއަމްގައި ސުވިޒަލޭންޑާއި ދެކޮޅަށް ކުޅޭ ނޭޝަންސް ލީގު މެޗުތަކުގައި ވެސް ބައިވެރިވާނެ ސްކޮޑެވެ.

ދެ ލަ ފުއެންޓެ ބުނީ އަނިޔާތަކަކީ ހިތާމަވެރި ކަމެއް ކަމަށެވެ. "އެހެން ބާވަތުގެ މެޗުތަކެއް ކަމުގައި ވިޔަސް، އަނިޔާތައް ލިބޭނެ. އަޅުގަނޑުމެންނަށް ކުރެވޭނެ ކަމަކީ އަނިޔާވެފައިވާ ކުޅުންތެރިން އަވަހަށް ރަނގަޅުވުމަށް އެދުން." އޭނާ ބުންޏެވެ.

ސްޕެއިން ހިމެނޭ ގުރޫޕް 4 ގައި މިހާތަނަށް އެއްވެސް މެޗަކުން ބަލިވެފައެއް ނުވެއެވެ. އެއްވަރުވީ ހަމައެކަނި ސާބިއާ އާއި ދެކޮޅަށް ކުޅުނު މެޗުގައެވެ. އެ މެޗުގައި އެއްވެސް ޓީމަކަށް ލަނޑެއް ނުޖެހެއެވެ.

ހުކުރު ދުވަހު ސްޕެއިން ޑެންމާކާއި ދެކޮޅަށް ކުޅޭއިރު ހޯމަ ދުވަހު ނުކުންނާނީ ސުވިޒަރލޭންޑާއި ދެކޮޅަށެވެ.