ޗެމްޕިއަންސް ލީގުގައި ރޭ ޕޯޗުގަލްގެ ސްޕޯޓިން ސީޕީ އަތުން 4-1 އިން ބަލިވެ ލިސްބަންގައި މެންޗެސްޓާ ސިޓީ މާޔޫސް ވެއްޖެއެވެ. އުއްމީދީ ފެށުމަކާއެކު ހަތަރު ވަނަ މިނެޓުގައި ފިލް ފޯޑެން ސިޓީއަށް ލީޑު ނަގައިދިނަސް، ޕެޕް ގާޑިއޯލާގެ ޓީމަށް ކޮންޓްރޯލް ދަމަހައްޓާލެވޭ ގޮތެއް ނުވި އެވެ.

ފުރަތަމަ ހާފުގައި ސިޓީ ޑޮމިނޭޓްކޮށް، ގިނަ ފުރުސަތުތަކެއް ތަނަވަސްކުރި ނަމަވެސް އިތުރު ގޯލެއް ނުޖެހުނެވެ. މެޗުގެ 38 ވަނަ މިނެޓުގައި ސްޕޯޓިން އަށް އެއްވަރުކޮށްދިނީ ވިކްޓަރ ގިއޮކެރޭސް އެވެ. ދެވަނަ ހާފް ފެށުނުއިރު ސްޕޯޓިންގ ޓީމުން ލީޑު ނަގާފައިވާއިރު، ދެވަނަ ލަނޑު ޖަހައިދިނީ މެޗު އަލުން ފެށިތާ ސިކުންތުކޮޅެއްގެ ތެރޭގައި މެކްސިމިލިއާނޯ އަރައުޖޯ އެވެ. އޭގެ ތިން މިނެޓް ފަހުން އިތުރު ގޯލެއް ޖިއޮކެރެސް ޖެހީ ލިބުނު ޕެނަލްޓީއަކުންނެވެ.

ސިޓީއަށް ނަތީޖާގެ ފަރަގު ކުޑަކޮށްލަން ރަނުގެ ފުރުސަތެއް ލިބުނެވެ. ނަމަވެސް އާލިންގް ހާލަންޑް ޖެހި ޕެނަލްޓީ ގޯލު ދަނޑިއާއި އަމާޒުވެ ސިޓީ އަށް އިތުރު އުނދަގުލަކާއި ކުރިމަތިލާން ޖެހުނުއިރު، ސްޕޯޓިން އިން އިތުރު ލަނޑެއް ޖަހައި ޖިއޮކެރެސް ވަނީ އޭނާގެ ހެޓްރިކް ފުރިހަމަ ކޮށްފައެވެ.

^{ސިޓީގެ ހާލަންޑަށް ނަތީޖާގެ ފަރަޤު ކުޑަކޮށްލަން ލިބުނު ރަނުގެ ފުރުޞަތު ވަނީ ބޭކާރުވެފައި. ސްޕޯޓިން ކޮޅަށް ގޯލެއް ނުޖެހުނަސް، މިހާތަނަށް ކުޅުނު 4 މެޗުން ހާޅަންޑް ވަނީ 3 ގޯލު ޖަހާފައި}

ސްޕެއިންގެ ވެލެންސިއާއަށް މިހާރު ދިމާވެގެންއުޅޭ ފެންބޮޑުވެ ފުރާނަތައް ގެއްލިގެން ދިޔުމުގެ ހާދިސާގެ ހިތާމައިގެ ސުކޫތު ވެސް ގެނައި މިމެޗުން ސިޓީ ބަލިވިއިރު، މިއީ ޖެހިޖެހިގެން އިއްތިހާދުގެ ޓީމު ބަލިވި ތިން ވަނަ ފަހަރެވެ.

ޕެޕް ގާޑިއޯލާ ވަނީ ސްޕޯޓިންގެ ކުޅުމަށް ތަޢުރީފުކޮށް، ގެއްލިފައިވާ ފުރުސަތުތަކާއި ސިޓީއަށް ކުރިމަތިވާ އުނދަގޫތައް ގަބޫލުކޮށްފަ އެވެ. މި ނަތީޖާއާ އެކު ސިޓީ މިހާރު އޮތީ ޗެމްޕިއަންސް ލީގު ގްރޫޕްގެ ހަވަނައިގައި ކަމުން ނޮކްއައުޓް ސްޓޭޖަށް ދަތުރުކުރުމުގެ މަގު ވަނީ އުނދަގޫވެފަ އެވެ. ސިޓީއަށް ދެން އޮތީ ޕްރިމިއާ ލީގުގައި އަންނަ ހޮނިހިރު ދުވަހު ބްރައިޓަންއާ ދެކޮޅަށް ކުޅެން ޖެހޭ މެޗެވެ..