ފުޓްބޯޅައިގެ ދުނިޔޭގައި އެންމެ މަތިވެރި ޝަރަފުތަކުގެ ތެރެއިން އެއް ޝަރަފެއް ކަމުގައިވާ ބެލޮންޑިއޯ އެވޯޑް މެންޗެސްޓާ ސިޓީގެ ސްޕެއިންގެ 28 އަހަރުގެ ކުޅުންތެރިޔާ ރޮޑްރީއަށް ލިބިއްޖެއެވެ. ފްރާންސްގެ ފުޓްބޯޅަ މަޖައްލާއިން ދޭ މި އެވޯޑަކީ އަހަރުގެ އެންމެ މޮޅު ފުޓްބޯޅަ ކުޅުންތެރިޔާއަށް ދެވޭ އެވޯޑެކެވެ.

ރޮޑްރީ މި އެވޯޑް ހޯދުމުގައި އެންމެ ގާތުން ވާދަކުރި ކުޅުންތެރިންނަކީ ރެއާލް މެޑްރިޑްގެ ދެ ކުޅުންތެރިންނެވެ. އެއީ ބްރެޒިލްގެ ވިނިޝިއަސް ޖޫނިއަރ އާއި އިނގިރޭސިވިލާތުގެ ޖޫޑް ބެލިންގްހަމްއެވެ. މިއީ ރޮޑްރީއަށް މި އެވޯޑް ލިބުނު ފުރަތަމަ ފަހަރެވެ. އަދި މެންޗެސްޓަރ ސިޓީގެ ކުޅުންތެރިއަކަށް މި އެވޯޑް ލިބުނު ފުރަތަމަ ފަހަރުވެސް މެއެވެ.

މެންޗެސްޓާ ސިޓީގެ މިޑްފީލްޑް “އިންޖީނު" ކަމަށް އެންމެންވެސް ޤަބޫލުކުރާ ރޮޑްރީ އަށް މި އެވޯޑު ލިބުނުއިރު، މިއީ ފަހަކަށް އައިސް ފޯވާޑުންގެ އަތުން މި އެވޯޑު ގެއްލި މިޑްފިލްޑަރަކަށް ލިބުނު ފުރަތަމަ ފަހަރެވެ. ފަހަކަށް އައިސް ފާއިތުވީ ތަނުގައި ފެނުނީ މެސީއާއި ރޮނާލްޑޯގެ އަތުން މި އެވޯޑު އެހެން ކުޅުންތެރިޔަކަށް ނުލިބި އޮތް މަންޒަރެވެ.

ރޮޑްރީއަށް މި އެވޯޑު ލިބުމުން ކިޔައިދިނީ ގިނަ ވާހަކަތަކެކެވެ. އެއީ ފުޓުބޯޅައިގެ އިންޑިވިޖުއަލް އެވޯޑެއް ދިނުމުގައި ބަލާއިރު، އެންމެންގެވެސް ލޮލުގައި އަޅައިގަންނަނީ ގޯލު ޖަހާ ކުޅުންތެރިޔާއެވެ. މިކަން ރޮޑްރީގެ ކޯޗު އަދި މެންޗެސްޓަރ ސިޓީގެ ކޯޗު ޕްޕެ ގާޑިއޯލާ ފާހަގަކުރިއެވެ.

ރޮޑްރީގެ މޮޅުކަން ފާހަގަވަނީ ހަމައެކަނި އޭނާގެ ފާހަގަކޮށްލެވޭ މޮޅު ޑިފެންސިވް ހުނަރުގެ ސަބަބުން އެކަންޏެއް ނޫނެވެ.

ބެލޮންޑިއޯ އެވޯޑަކީ ފީފާއިން ދޭ އަހަރުގެ އެންމެ މޮޅު ކުޅުންތެރިޔާގެ އެެވޯޑަށްފަހު އެންމެ ގިނަ ބަޔަކު ބަލައިގަންނަ އެވޯޑެވެ. މި އެވޯޑަށް ކުޅުންތެރިން ހޮވުމުގައި ފީފާ ރޭންކިންގެ ގަދަ 100 ގެ ތެރޭގައި ހިމެނޭ ގައުމުތަކުގެ ނޫސްވެރިންގެ މެދުގައި ނަގާ ވޯޓެއް ބޭނުންކުރެއެވެ. މިއީ މި އެވޯޑްގެ ހާމަކަން ބޮޑުކަމާއި އިންސާފުވެރިކަން ކަށަވަރުކޮށްދޭ ކަމެކެވެ.