ފުޓްބޯޅައިގެ އެންމެ މަޝްހޫރު އަދި ޝަރަފުވެރި އެވޯޑު ކަމަށްވާ ބެލޮންޑިއޯ ފްރާންސް އަދި ޕީއެސްޖީގެ ތަރި ޑެމްބަލޭ ހޯދައިފިއެވެ. ޑެމްބަލޭއާ މި އެވޯޑު ހަވާލުކޮށްފައިވަނީ ބްރެޒިލް ލެޖެންޑު ރޮނާލްޑީނިއޯ އެވެ.
ޑެމްބަލޭ މި މަގާމު ހޯދާފައިވަނީ ލަމިން ޔަމާލް ފަހަތަށް ޖައްސާލުމަށްފަހުގައެވެ. ޔަމާލަށް ލިބިފައިވަނީ އެންމެ މޮޅު ޒުވާން ފިރިހެން ކުޅުންތެރިޔާގެ މަގާމެވެ. އެންމެ މޮޅު ފިރިހެން ކުޅުންތެރިޔާގެ މަގާމުގެ ތިން ވަނަ ހޯދާފައިވަނީ ޕީއެސްޖީ އަދި ޕޯޗުގަލްގެ މެދުތެރެއަށް ކުޅޭ ވިޓީނިއާ އެވެ.
Advertisement
ލަމިން ޔަމާލް - ފޮޓޯ: ފްރާންސް ފުޓްބޯޅަ ފެޑެރޭޝަން
ބެލޮންޑިއޯގެ ޓްރޮފީއާއެކު ޑެމްބަލޭ ވަނީ އޭނާގެ އިހްސާސް ބަންޑުންކޮށްލާ އޯޑިއަންސް ރޮއްވާލާފައެވެ. އޭނާ ވަނީ ޕީއެސްޖީގެ ހުރިހާ ކުޅުންތެރިންގެ އިތުރުން ކޯޗު އެންރީކޭ އަށް ވަރަށް ބޮޑަށް ޝުކުރު އަދާކޮށްފައެވެ. އަދި އެހިސާބަށް ގެންގޮސްދިނުމަށް އޭނާގެ އާއިލާއަށް، ހާއްސަކޮށް އޭނާގެ މަންމަ ކުރި ބުރަ މަސައްކަތުގެ އަގު ވަޒަންކޮށްފައެވެ.
ޓްރޮފީއާ ހަވާލުވުމަށް ޑެމްބަލޭ ސްޓޭޖަށް އަރަނީ - ފޮޓޯ: ފްރާންސް ފުޓްބޯޅަ ފެޑެރޭޝަން
މިއަހަރުގެ އެންމެ މޮޅު އަންހެން ފުޓުބޯޅަ ކުޅުންތެރިޔަކަށް ހޮވިފައިވަނީ ބާސެލޯނާ އަދި ސްޕެއިންގެ އައިޓާނާ ބޮމަޓީއެވެ. މިއީ އޭނާ މި އެވޯޑު ޖެހިޖެހިގެން ހޯދި ތިން ވަނަ ފަހަރެވެ.
އައިޓާނާ ބޮންމަޓީ - ފޮޓޯ: ފްރާންސް ފުޓްބޯޅަ ފެޑެރޭޝަން
އޭނާއާ އެންމެ ގާތުން ވާދަކުރީ ސްޕެއިން އަދި އާސެނަލްގެ މެދުތެރެއަށް ކުޅޭ މަރިއޯނާ ކަލްޑެންޓޭ އެވެ.
އެންމެ މޮޅު ޒުވާން އަންހެން ކުޅުންތެރިޔާގެ މަގާމު ލިބިފައިވަނީ ބާސެލޯނާ އަދި ސްޕެއިންގެ މިޑްފީލްޑަރ ވިކީ ލޮޕޭޒަށެވެ.
ވިކީ ލޮޕޭޒް - ފޮޓޯ: ފްރާންސް ފުޓްބޯޅަ ފެޑެރޭޝަން
އަހަރުގެ އެންމެ މޮޅު ފިރިހެން ކޯޗުގެ މަގާމު ޕީއެސްޖީގެ ކޯޗު ލުއިސް އެންރީކޭ އަށް ލިބިފައިވާއިރު އެންމެ މޮޅު އަންހެން ކޯޗަކަށް ހޮވިފައިވަނީ އިންގްލެންޑް ގައުމީ ޓީމުގެ ކޯޗު ސަރީނާ ވިއެގްމޭން އެވެ. ޕީއެސްޖީގެ މެޗެއް މިރޭ އޮތުމުން އެންރީކޭ ހަފްލާއަށް ވަޑައިގެންފައެއް ނުވެއެވެ.
ޔަޝިން ޓްރޮފީގެ ނަމުން ނަންދީފައިވާ އެންމެ މޮޅު ކީޕަރު ކަމުގެ މަގާމް ހޯދާފައިވަނީ ނިމިދިޔަ ސީޒަނުގައި ޕީއެސްޖީއަށް ކުޅުނު އިޓަލީގެ ކީޕަރު ޑޮނަރޫމާއެވެ. އަދި އަންހެން މޮޅު ކީޕަރަކަށް ހޮވިފައިވަނީ ޗެލްސީ އަދި އިންގްލެންޑުގެ ކީޕަރު ހަނާ ހެމްޕްޓަންއެވެ.
ގާޑް މުލާ ޓްރޮފީ ނުވަތަ އެންމެ ގިނަ ގޯލި ޖެހި ކުޅުންތެރިޔާގެ މަގާމު ލިބިފައިވަނީ ވިކްޓޮ ގޮއޮކަރެސް އަދި އަންހެން ކުޅުންތެރިޔަކަށް ހޮވިފައިވަނީ އިވަރ ޕަޖޯރެވެ.
ދަނޑުން ބޭރުގައި އިޖްތިމާއީ އަދި އިންސާނިއްޔަތަށް މަސައްކަތްކުރާ ކުޅުންތެރިންގެ އަގުވަޒަންކުރުމުގެ ގޮތުން ދޭ އެވޯޑު ކަމަށްވާ ސޮކަރެޓެސް އެވޯޑު ލިބިފައިވަނީ ސިރަ މާޓިނޭޒަށެވެ.
ދުނިޔޭގެ އެންމެ މޮޅު ފިރިހެން ކުލަބަކަށް ޕީއެސްޖީ ހޮވިފައިވާއިރު އަންހެން ކުލަބަކަށް ހޮވިފައިވަނީ އާސެނަލެވެ. މި ދެކުލަބުން ވަނީ ގިނަ ކާމިޔާބީތަކެއް ނިމިދިޔަ ސީޒަނުގައި ހޯދާފައެވެ. އޭގެ ތެރޭގައި ޗެމްޕިއަންސް ލީގު ހިމެނެއެވެ.
