އެރިކްސަން ލަނޑ ޖެހުމަށްފަހު އުފާފާޅުކުރާއިރު ކައިރީގައި ރަޝްފޯޑް
ޔޫއެފާ ޔޫރޮޕާ ލީގުގައި ރޭ ކުޅުނު ފޯރިގަދަ މެޗެއްގައި މެންޗެސްޓާ ޔުނައިޓެޑުން ލަނޑެއް ޖަހައިފައިވަނިކޮށް ތުރްކިޔޭގެ ފެނެބާޗޭއިން އެއްވަރުކޮށްފިއެވެ.
ގާތްގަނޑަކަށް ހަމަހަމަ ކުޅުމެއް ފެނުނު މެޗުގެ 15 ވަނަ މިނެޓުގައި ކްރިސްޓިއަން އެރިކްސަން ޔުނައިޓެޑަށް ލަނޑު ޖަހައިދިން ނަމަވެސް، ދެވަނަ ހާފް ފެށިގެން އެންމެ ހަތަރު މިނެޓްތެރޭ ފެނަބަޗޭގެ ޔޫސުފް އެންނަސޭރީ ވަނީ ގޯލެއް ޖަހައި އެއްވަރުކޮށްދީފައެވެ.
ގިނަ ފައުލްތައް ފެނިގެންދިޔަ މެޗަށް ބޮޑު ބަދަލެއް އައީ ފެނަބަޗޭގެ ހެޑް ކޯޗު ހޯސޭ މޮރީނިއޯ އަށް ދެއްކި ރަތްކާޑަކުންނެވެ. މެޗު ފެށިގެންވެސް ރެފްރީގެ ނިންމުންތަކާއިމެދު ހިތްހަމަނުޖެހުން ފާޅުކުރަމުންދިޔަ މޮރީނިއޯއަށް ފްރާންސްގެ ރެފްރީ ކްލެމެންޓް ޓާޕިން ރަތްކާޑު ދެއްކީ ދެވަނަ ހާފުގެ ކުޅުން ފެށުނުތާ ޔުނައިޓެޑްގެ މެނުއެލް އުގާޓޭ އޭރިޔާ ތެރެއިން ފެނަބާޗޭގެ އޮސާއީ ސެމުއެލްއަށް ކުރި ފައުލަކާ ގުޅިގެން ޕެނަލްޓީއެއް ދީފައިނުވާތީ އެކަމާ ހިތްހަމަނުޖެހުން ފާޅުކުރުމުންނެވެ. ޔޫއެފާގެ އޮފިޝަލުންނަށް މޮރީނިއޯގެ ހިތްހަމަނުޖެހުންތަކަކީ އާ ކަމެއް ނޫނެވެ.
ފެނެބާޗޭގެ ކޯޗު މޮރީނިއޯ އަށް ރަތްކާޑު ދައްކައި ފޮނުވާލަނީ.
ޔޫރޮޕާ ލީގުގައި މެންޗެސްޓަރ ޔުނައިޓެޑުން މިހާތަނަށް ކުޅުނު 3 މެޗުވެސް ވީ އެއްވަރެވެ. އެ ޓީމު އޮތީ 36 ޓީމު ވާދަކުރާ މުބާރާތުގެ 21 ވަނައިގައެވެ. ފެނަބާޗޭ ވަނީ ކުޅުނު ތިން މެޗުގެ ތެރެއިން އެއް މެޗުން މޮޅުވެ އަނެއް ދެމެޗުން އެއްވަރުކޮށްފައެވެ. އެޓީމު އޮތީ ފަސްޕޮއިންޓާއެކު 14 ވަނައިގައެވެ. އެއްވަނައިގައި އޮތީ ކުޅުނު ތިންމެޗުން 9 ޕޮއިންޓް ހޯދި އިޓަލީގެ ލާޒިއޯއެވެ.
