ދިވެހިރާއްޖޭގެ އިޤްތިޞާދީ ތަރައްޤީއަށް އައު ބާރެއް ލިބޭނެ ކަމަށް ބެލެވޭ މޯލްޑިވްސް ޑިވެލޮޕްމަންޓް ބޭންކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލައިސަންސް ދޫކޮށްފިއެވެ.
އެމްއެމްއޭގައި ބޭއްވުނު ޚާއްޞަ ރަސްމިއްޔާތެއްގައި މި ލައިސަންސް ހަވާލުކޮށްދެއްވީ އެމްއެމްއޭގެ ގަވަރުނަރު އަހުމަދު މުނައްވަރެވެ. ލައިސަންސާއި ހަވާލުވެވަޑައިގަތީ އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުހައްމަދު ސަޢީދެވެ.
ރާއްޖޭގެ ފުރަތަމަ ޑިވެލޮޕްމަންޓް ބޭންކު އުފެއްދެވީ ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން މިއަހަރުގެ މޭ މަހުގެ 16 ވަނަ ދުވަހުއެވެ. މި ބޭންކު އުފެއްދުމަށް ބޭނުންވާ ލައިސަންސް ހޯދުމަށް އެމްއެމްއޭއަށް ހުށަހަޅާފައިވަނީ މިދިޔަ ޖުލައި މަހުއެވެ.
Advertisement
ސަރުކާރުން މި ބޭންކު ޤާއިމްކުރުމުގެ މައިގަނޑު މަޤްޞަދުތަކުގެ ތެރޭގައި ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމަމަށެވެ އަދި ޕީއެސްއައިޕީ މަޝްރޫޢުތަކަށް ފައިސާ ހޯދުމުގައި ދިމާވާ ގޮންޖެހުންތައް ޙައްލުކުރުމާއި، ރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުންވެސް ހިމެނެއެވެ.
މި މަހުގެ 21 ވަނަ ދުވަހު މޯލްޑިވްސް ޑިވެލޮޕްމަންޓް ބޭންކްގެ ބޯޑަށް މެންބަރުން ޢައްޔަންކުރެވުނެވެ. ބޭންކުގެ ޗެއަރޕަރސަންގެ މަޤާމަށް އައްޔަންކުރެއްވީ ސިންގަޕޫރުގެ އަރޫނީ ގުނިޓެލެކެވެ. ސީއީއޯގެ މަޤާމަށް އައްޔަންކުރެއްވީ ނޮއެލް ގްރެގަރއެވެ.
މޯލްޑިވްސް ޑިވެލޮޕްމަންޓް ބޭންކުގެ އިމާރާތް ޤާއިމްކުރެވޭނީ މާލޭގެ ޗާންދަނީ މަގާއި އަމީރު އަޙްމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގެ ތިރީ ބުރީގައެވެ.
