ރާއްޖެއާއި ސައުދީ އަރަބިއާ އާމެދު ވިޔަފާރިއާއި އިންވެސްޓްމެންޓްގެ ދާއިރާއިން ގުޅުން ވަރުގަދަ ކުރުމަށް ސައުދީ އަރަބިއާގެ ޖެނެރަލް އޮތޯރިޓީ އޮފް ފޮރިން ޓްރޭޑާއެކު އެމްއޯޔޫއެއްގައި ސޮއިކޮށްފިއެވެ.
އިކޮނޮމިކް މިނިސްޓްރީން ބުނީ މިއީ ދެ ޤައުމުގެ ދެމެދުގައި ވިޔަފާރީގެ އެއްބާރުލުމާއި އިންވެސްޓްމެންޓްގެ ގުޅުން އިތުރަށް ބަދަހިކުރުމަށް ފެށިގެންދިޔަ އައު ބާބެއް ކަމަށެވެ.
މި އެމްއޯޔޫގައި ސޮއިކޮށްފައިވަނީ އިކޮނޮމިކް މިނިސްޓަރ މުޙައްމަދު ސައީދު ރިޔާދަށް ކުރެއްވި ދަތުރުފުޅުގައި ސައުދީ އަރަބިއާގެ ޖެނެރަލް އޮތޯރިޓީ އޮފް ފޮރިން ޓްރޭޑާއެކު އިއްޔެ ކަމަށް އިކޮނޮމިކް މިނިސްޓްރީން ބުންޏެވެ.
Advertisement
އެ އެމްއޯޔޫގައި ރާއްޖޭގެ ފަރާތުން ސޮއިކުރައްވާފައިވަނީ މިނިސްޓަރ ސައީދެވެ. އަދި ސައުދީ އަރަބިއާގެ ފަރާތުން ސޮއިކުރެއްވީ މިނިސްޓަރ އޮފް ކޮމާސް އަދި ޖެނެރަލް އޮތޯރިޓީ އޮފް ފޮރިން ޓްރޭޑް ބޯޑުގެ ޗެއާމަން ޑރ. މާޖިދު ބިން އަބްދުﷲ އަލްޤަސަބީއެވެ.
މިނިސްޓަރ އޮފް ކޮމާސް އަދި ޖެނެރަލް އޮތޯރިޓީ އޮފް ފޮރިން ޓްރޭޑް އާއެކު ބޭއްވި ބައްދަލުވުން.
އިކޮނޮމިކް މިނިސްޓްރީން ބުނީ މި އެމްއޯޔޫގެ ސަބަބުން ދެ ޤައުމުގެ ވިޔަފާރީގެ ގުޅުން ހަރުދަނާކުރެވި ބޯޑަރު ހުރަސްކުރެވޭ ފޮރިން އިންވެސްޓްމަންޓްތައް އިތުރަށް ފުޅާކުރުމަށް މަގުފަހިވެގެންދާނެ ކަމަށެވެ. އެގޮތުން ވިޔަފާރިއާއި ފަތުރުވެރިކަން އަދި ޢިމާރާތްކުރުން ފަދަ މުހިންމު ދާއިރާތަކުން ދެޤައުމުގެ ދެމެދުގައި ގުޅުން އިތުރަށް ބަދަހިވެގެންދާނެ ކަމަށް މިނިސްޓްރީން ބުންޏެވެ.
މީގެ އިތުރުން މި އެމްއޯޔޫއަކީ ދެޤައުމުގެ ދެމެދުގައި ޒަމާނުއްސުރެ ޤާއިމްކޮށްފައިވާ ގާތް ގުޅުމުގެ ރަމްޒެއް ކަމަށާއި މި އެމްއޯޔޫގެ އެހީގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރު ރާސްތާ އިޤްތިޞާދީ ވިސްނުންފުޅު ޙާސިލްކުރުމަށް އިތުރު ބާރެއް ލިބިގެންދާނެ ކަމަށް މިނިސްޓްރީން ބުންޏެވެ.
