ސުޕަ ކަޕް 2024ގެ ޗެމްޕިއަންކަން ހޯދި ލަންކާގެ އީގަލްސްގެ އަންހެން ޓީމު - އީގަލްސްއިން ތަށި ހޯދީ ފައިނަލް މެޗުގައި 74 ޕޮއިންޓް 72 ޕޮއިންޓުން ކުއީންސް ބަލިކޮށްގެން
މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމުކޮށްގެން ބޭއްވި ސުޕަ ކަޕް 2024 ގެ ފިރިހެން އަދި އަންހެން ބައިގެ ޗެމްޕިއަންކަން ސްރީ ލަންކާގެ އީގަލްސް ކުލަބުން ހޯދައިފިއެވެ. މި މުބާރާތް ކުރިއަށް ގެންދިޔައީ ޒުވާނުންގެ މަރުކަޒުގެ އެތެރޭ ކޯޓުގައެވެ.
Advertisement
ރޭ ކުޅުނު ފިރިހެން ބައިގެ ފައިނަލް މެޗުގައި ލަންކާގެ އީގަލްސް އިން ވަނީ 77-71 އިން ރެޑްވިންގްސް ބަލިކޮށްފައެވެ. މި މެޗުގެ މޮޅު ކުޅުންތެރިޔާގެ މަޤާމު ހޯދީ އީގަލްސްގެ ނިމޭޝް ފެނާންޑޯ އެވެ. އޭނާ ވަނީ 22 ޕޮއިންޓް ހޯދައިދީ، ހަތް ރީބައުންޑް ނަގައި، ދެ އެސިސްޓް ކޮށްފައެވެ. މުޅި މުބާރާތުގެ ފިރިހެން ބައިގެ އެންމެ މޮޅު ކުޅުންތެރިޔާގެ މަޤާމު ހޯދީ ކިންގްސްގެ އެލީޖާ ކްރިސްޓަން ބެއިލީ އެވެ.
އިއްޔެ ހަވީރު ކުޅުނު އަންހެން ބައިގެ ފައިނަލް މެޗުގައި އީގަލްސް އިން ވަނީ 74-72 އިން ކުއީންސް ބަލިކޮށްފައެވެ. މި މެޗުގެ މޮޅު ކުޅުންތެރިޔާގެ މަޤާމު ހޯދީ ކުއީންސްގެ ފާތިމަތު ރިޝްމާ އެވެ. އޭނާ ވަނީ 19 ޕޮއިންޓް ހޯދައިދީ، 13 ރީބައުންޑް ނަގައިދީ، ތިން އެސިސްޓް ކޮށްފައެވެ. މުޅި މުބާރާތުގެ އަންހެން ބައިގެ އެންމެ މޮޅު ކުޅުންތެރިޔާގެ މަޤާމު ހޯދީ އީގަލްސްގެ ނިރްމާ ސަސަންތީ އެވެ.
ސަރުކާރުގެ ފަރާތުން މި މުބާރާތް ބޭއްވުމަށް ދެއްވި އެހީތެރިކަމާއި އެއްބާރުލުން ފާހަގަކޮށް، މޯލްޑިވްސް ބާސްކެޓްބޯލް އެސޯސިއޭޝަންގެ ރައީސް ޝުކުރު އަދާކުރެއްވިއެވެ. އަދި ޒުވާނުންގެ މަރުކަޒުގެ ވަސީލަތްތައް ބޭނުންކުރުމުގެ ފުރުސަތު ދެއްވި ކަމަށްޓަކައި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓަށް ޝުކުރު ދެންނެވިއެވެ.
މި މުބާރާތަކީ ރާއްޖޭގެ ބާސްކެޓްބޯލް ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތުގެ ތެރެއިން ބޭއްވުނު މުހިންމު މުބާރާތެއް ކަމުގައި ފާހަގަކުރެވެއެވެ. ސަރުކާރުން ކުޅިވަރު ކުރިއެރުވުމަށް ގެންގުޅުއްވާ ސިޔާސަތުގެ ދަށުން، ކުރިއަށް އޮތް ތަނުގައިވެސް މިފަދަ މުބާރާތްތައް އިތުރަށް ބާއްވައި، ދިވެހި ޒުވާނުންނަށް ފުރުސަތު ހޯދައިދިނުމަށް މަސައްކަތް ކުރައްވާނެ ކަމަށް ވަނީ ވިދާޅުވެފައެވެ.
