ބިދޭސީންގެ މަޢުލޫމާތު އެއްކުރުމަށް ކުރިއަށްގެންދާ ކުރަންގި އޮޕަރޭޝަން މިހާތަނަށް 2 ރަށަކުން ނިންމާލާފައިވާކަމަށް ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ވިދާޅުވެއްޖެއެވެ.
ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ބުނާ ގޮތުގައި، ގަވާއިދާ ޚިލާފަށް އުޅޭ ބިދޭސީންގެ މައްސަލަތައް ޙައްލުކުރުމަށް ސަރުކާރުގެ ކަމާބެހޭ އިދާރާތައް ގުޅިގެން ކުރިއަށްގެންދާ ކުރަނގި އޮޕަރޭޝަންގެ މަސައްކަތް މިހާތަނަށް ނިމިފައިވަނީ ހއ. މުރައިދޫއާއި ހއ. މޮޅަދޫގައެވެ. މި ދެ ރަށުގެ ކައުންސިލުން ވަނީ އެ ރަށްރަށުގައި ތިބި ބިދޭސީންގެ މަޢުލޫމާތު އެ ވުޒާރާއިން އެކުލަވާލާފައިވާ ޕޯޓަލްއަށް އަޕްޑޭޓްކޮށްފައެވެ.
މި އޮޕަރޭޝަންގެ ތެރެއިން ގަވާއިދާ ޚިލާފަށް ރާއްޖެއަށް އެތެރެކޮށްފައިވާ ގިނަ ޢަދަދެއްގެ ބިދޭސީން ތިބިކަން ހާމަވަމުންދާ ކަމަށް އެ ވުޒާރާއިން ފާހަގަކޮށްފައިވެއެވެ. އޭގެ ތެރޭގައި ބެލެނިވެރި ފަރާތެއް ނެތި، އޮޕަން ވިސާއާއި ފްރީ ވިސާގެ ނަމުގައި ރާއްޖެ އައިސް އަމިއްލަ މަސައްކަތުގައި ޝާމިލުވެގެން އާމްދަނީ ހޯދަމުންދާ ބިދޭސީން ހިމެނެއެވެ.
Advertisement
މާލޭގައި މި އޮޕަރޭޝަން ފެށުމަށް ތައްޔާރުވަމުންދާ ކަމަށް ވުޒާރާއިން ބުނެފައިވާއިރު، މިހާރުވެސް މާލެ ސަރަޙައްދުގައި ގަވާއިދާ ޚިލާފަށް ވިޔަފާރިކުރާ އަދި އާންމު ސަލާމަތަށް ނުރައްކާވެދާނެ ގޮތަށް އުޅޭ ބިދޭސީންގެ އެކޮމޮޑޭޝަން ބްލޮކްތައް ރެއިޑުކޮށް، ގިނަ ޢަދަދެއްގެ ބިދޭސީން މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސް، ބައެއް މީހުން އެމީހުންގެ ޤައުމުތަކަށް ފޮނުވާލާފައިވާ ކަމަށް ވުޒާރާއިން ބުނެފައިވެއެވެ.
