ސަރުކާރުން އަޅަމުންދާ ތަންފީޒީ ފިޔަވަޅުތަކާއެކު، ބިދޭސީންގެ ކޯޓާ ފީގެ ގޮތުގައި ދައުލަތަށް ލިބުނު އާމްދަނީ މިއަހަރުގެ މިހާތަނަށް ދެގުނަ އިތުރުވެއްޖެއެވެ. މި މަޢުލޫމާތު ހާމަކޮށްފައިވަނީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ނެރެފައިވާ މިދިޔަ މަހުގެ އާމްދަނީ ރިޕޯޓުގައެވެ.

ރިޕޯޓުގައިވާ ގޮތުން، މިއަހަރުގެ އޮގަސްޓް މަހުގެ ނިޔަލަށް ކޯޓާ ފީގެ ގޮތުގައި ދައުލަތަށް ލިބިފައިވަނީ 232 މިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތުގައި ލިބުނު 104 މިލިއަން ރުފިޔާއާ އަޅާބަލާއިރު 123 އިންސައްތައިގެ އިތުރުވުމެކެވެ.

އޮގަސްޓް މަހަށް އެކަނި ބަލާއިރު، މިއަހަރު ލިބިފައިވަނީ 36 މިލިއަން ރުފިޔާއެވެ. މިއީ މިދިޔަ އަހަރުގެ އޮގަސްޓް މަހާ އަޅާބަލާއިރު 33.7 އިންސައްތައިގެ އިތުރުވުމެކެވެ. މިދިޔަ އަހަރުގެ އޮގަސްޓް މަހު ލިބިފައިވަނީ 27 މިލިއަން ރުފިޔާއެވެ.

^{ފޮޓޯ: ޚުލާސާ}

ބިދޭސީންގެ ކޯޓާ ފީ ދައްކަނީ އެކްސްޕެޓް ސިސްޓަމް މެދުވެރިކޮށް މީރާއަށެވެ. ސަރުކާރުން މިހާރު ދަނީ ވަޒީފާ އަދާކުރާ ބިދޭސީންނާ ގުޅިގެން ދައްކަންޖެހޭ ފީތަކާއި ޖޫރިމަނާ އެއްލައްކަ ރުފިޔާއަށްވުރެ މަތިވެފައިވާ ފަރާތްތަކުން، ދައުލަތަށް ދައްކަންޖެހޭ ފައިސާ ދެއްކުމަށް ބާރުއަޅަމުންނެވެ.

ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ބުނާ ގޮތުގައި، ރާއްޖޭގައި ބިދޭސީންނަށް ވަޒީފާ ދޭ 50,000 އަށްވުރެ ގިނަ ފަރާތްތަކުގެ ތެރެއިން 90 އިންސައްތަ ނުވަތަ 45,000 އަށްވުރެ ގިނަ ފަރާތްތަކުން ޤަވާއިދުން ފީ ނުދައްކައެވެ.

މި އިތުރުވުން އައިސްފައިވަނީ ސަރުކާރުން އަޅަމުންދާ ތަންފީޒީ ފިޔަވަޅުތަކާ ގުޅިގެންކށް ލަފާކުރެވެއެވެ. މިކަމުގެ ސަބަބުން ދައުލަތުގެ އާމްދަނީ އިތުރުވެ، ޤާނޫނާ ޚިލާފަށް ބިދޭސީން ގެންގުޅޭ މިންވަރު މަދުވާނެކަމަށް އުންމީދު ކުރެވެއެވެ.