ޤަވާއިދާ ޚިލާފަށް އުޅޭ ބިދޭސީންނަށް އަމާޒުކޮށް ކުރިއަށްގެންދާ އޮޕަރޭޝަންގެ ތެރެއިން 16 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ. އިމިގްރޭޝަނުން ވިދާޅުވީ މިމީހުންނަކީ ޢާއްމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަކަށް މާލެ ސަރަޙައްދުގައި ދިރިއުޅެމުންދިޔަ ބައެއްކަމަށެވެ.

މޯލްޑިވްސް އިމިގްރޭޝަނުން މިހާރު ކުރިއަށްގެންދާ ބޮޑު އޮޕަރޭޝަންގެ ދަށުން މާލޭގެ އެކި ސަރަޙައްދުތައް ބަލައި ފާސްކުރުމުގެ މަސައްކަތް ދަނީ ކުރަމުންނެވެ. އެގޮތުން ބިދޭސީން ދިރިއުޅެމުންދިޔަ 4 ގެއެއް ބަލައި ފާސްކުރުމަށް ކުރިއަށްގެންދިޔަ ރެއިޑުތަކުގައި މާފަންނުން 16 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އެއިދާރާއިން ބުނެފައިވެއެވެ.

އިމިގްރޭޝަނުން އިތުރަށް ވިދާޅުވީ، ބަލައި ފާސްކުރި ބައެއް ތަންތަނަކީ ސާފުތާހިރުކަމަށް ބެލުމެއް ނެތި ވިޔަފާރިކުރުމުގެ ބޭނުމުގައި އެކި ބާވަތުގެ ކާބޯތަކެތި ތައްޔާރުކުރަމުންދިޔަ ތަންތަންކަމަށެވެ. މީގެ އިތުރުން، މިތަންތަނުގައި ހުރީ ޢާއްމު ސަލާމަތަށް ނުރައްކާވެދާނެ ފަދަ ގޮތްތަކަށްކަންވެސް އެއިދާރައިން ފާހަގަކުރައްވައެވެ.

އިމިގްރޭޝަނުން ޢާއްމުުކޮށްފައިވާ ވީޑިއޯގައި ދުފުމަށް ބޭނުންކުރާ ކިއްލި ތައްޔާރުކުރުމަށް ބޭނުންވާ އެކި ބާވަތްތައް ހުރިކަން ފާހަގަކޮށްލެވެއެވެ. އަދި ގޭސް އުނދުން ނުރައްކާތެރިގޮތަކަށް ބޭނުންކުރަމުންދިޔަކަމާއި، ސާފުތާހިރުކަމެއް ނެތި ކާޑުގެ އެކި ބާވަތްތަކާއި ކެއްކުމަށް ބޭނުންކުރާ އެނޫންވެސްތަކެތި ބޭނުންކުރަމުން ގޮސްފައިވާކަންވެސް ވީޑިއޯތަކުން ފެންނަން ހުއްޓެވެ.

ޢާއްމު ސަލާމަތަށް ނުރައްކާވާފަދަ ގޮތްގޮތަށް ތޮއްޖެހިގެން ބިދޭސީން ދިރިއުޅެމުންދާ ތަންތަނަށް އަމާޒުކޮށް އިމިގްރޭޝަންގެ އޮޕަރޭޝަން މިހާރު ވަނީ ފުޅާކޮށްފައެވެ. މިފަދަ ތަންތަނުގައި މީގެކުރިން ހިނގާފައިވާ އަލިފާނުގެ ބޮޑެތި ޙާދިސާތަކުގައި ހިތާމަވެރި އެތައްކަމެއްވަނީ ހިނގާފައެވެ.

ރާއްޖޭގައި ގަވާއިދާ ޚިލާފަށް ބިދޭސީން ފުޅާ ދާއިރާއެއްގައި ވިޔަފާރިކުރަމުންދާކަން ހާމަވެފައިވާއިރު އެކަންކަން ހުއްޓުވުމަށް ސަރުކާރުގެ ހުރިހާ މުވައްސަސާތަކެއް ވަނީ ގުޅިގެން މަސައްކަތް ފަށާފައެވެ.

މި އޮޕަރޭޝަންގެ މައިގަނޑު މަޤްޞަދަކީ ރާއްޖޭގައި ޤާނޫނާއި ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމާއި، އެފަދަ ފަރާތްތަކުން ޢާއްމު ރައްޔިތުންގެ ސަލާމަތާއި ރައްކާތެރިކަމަށް ކުރިމަތިވެދާނެ ނުރައްކާތައް ކުޑަކުރުމެވެ. އިމިގްރޭޝަނުން އިތުރަށް ވިދާޅުވީ، މި އޮޕަރޭޝަން ކުރިއަށްދާނީ ޤާނޫނާއި ގަވާއިދުތަކާ އެއްގޮތްވާ ގޮތުގެމަތިން، އިންސާނީ ޙައްޤުތަކަށް އިޙްތިރާމްކުރުމާއެކުގައި ކަމަށެވެ.

"މިފަދަ ތަންތަނުގައި ދިރިއުޅޭ ބިދޭސީންގެ ސަބަބުން ޢާއްމު ސިއްޙަތަށާއި ރައްކާތެރިކަމަށް ވަރަށް ބޮޑެތި ނުރައްކާތަކެއް ކުރިމަތިވެދާނެ. އަޅުގަނޑުމެން މި އޮޕަރޭޝަން ކުރިއަށްގެންދަނީ މި މައްސަލަތައް ޙައްލުކުރުމަށާއި، ރާއްޖޭގެ އިމިގްރޭޝަން ޤާނޫނުތަކާއި ގަވާއިދުތައް ތަންފީޒުކުރުމަށްޓަކައި". އިމިގްރޭޝަނުގެ ސްޕޯކްސްޕަރސަން އަޙްމަދު ޝިފާޢު ބުންޏެވެ.

މި އޮޕަރޭޝަންގެ ދަށުން ހައްޔަރުކުރެވޭ ބިދޭސީންގެ ތެރެއިން ޤާނޫނީގޮތުން ރާއްޖޭގައި ހުރުމުގެ ހުއްދަ ނެތް ފަރާތްތައް އެމީހުންގެ އަމިއްލަ ޤައުމުތަކަށް ފޮނުވާލެވޭނެކަމަށް އިމިގްރޭޝަނުން ވިދާޅުވެއެވެ. އަދި މިކަމުގައި ރާއްޖޭގައި ހުރި ބޭރު ޤައުމުތަކުގެ އެމްބަސީތަކާއި ހައިކޮމިޝަންތަކުގެ އެހީތެރިކަން ހޯދާނެކަމަށްވެސް ވިދާޅުވިއެވެ.

ރާއްޖޭގައި ޤާނޫނާ ޚިލާފަށް އުޅޭ ބިދޭސީންގެ މައްސަލައަކީ އެތައް އަހަރެއް ވަންދެން ދިވެހި މުޖުތަމަޢުއަށް ކުރިމަތިވެފައިވާ ބޮޑު މައްސަލައެކެވެ. މި މައްސަލަ ޙައްލުކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުން އަންނަކަމަށް ބުނެއެވެ. ނަމަވެސް، މިކަމަކީ ދިގު މުއްދަތެއްގެ ތެރޭގައި ޙައްލުކުރެވޭނެ ކަމެއްކަމަށް ސަރުކާރުން ފާހަގަކުރެއެވެ.

އާންމު ރައްޔިތުންނަށް އިމިގްރޭޝަނުން ގޮވާލަނީ، ޤާނޫނާ ޚިލާފަށް އުޅޭ ބިދޭސީންނާ ބެހޭ މަޢުލޫމާތު ލިބިއްޖެނަމަ، ވީ އެންމެ އަވަހަކަށް އިމިގްރޭޝަނަށް އެންގުމަށެވެ. މިގޮތުން މަޢުލޫމާތު ހިއްސާކުރުމަށް ޚާއްޞަ ހޮޓްލައިނެއް ޤާއިމުކޮށްފައިވާކަމަށްވެސް އިމިގްރޭޝަނުން ބުނެފައިވެއެވެ.