ގއ. ވިލިނގިލީގައި ތަރައްޤީކުރަމުންދާ 50 ހައުސިން ޔުނިޓުގެ މަޝްރޫޢުގެ 53 އިންސައްތަ މަސައްކަތް ނިމިފައިވާކަމަށް މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން ހާމަކޮށްފިއެވެ.
48.16 މިލިއަން ރުފިޔާގެ މި މަޝްރޫޢު ދޮންބޭޒް ޕްރައިވެޓް ލިމިޓެޑާ ހަވާލުކުރެވުނީ 2022 ވަނަ އަހަރުގެ ޖޫން މަހުއެވެ. ނަމަވެސް، 270 ދުވަހުގެ މުއްދަތު ހަމަވިއިރުވެސް މަސައްކަތް ނިންމާލެވިފައެއް ނުވެއެވެ.
މި މަޝްރޫޢުގެ ދަށުން ތަރައްޤީކުރެވޭ ހައުސިން ޔުނިޓުތަކަކީ ދެ ފަންގިފިލާގެ ރޯހައުސްތަކެކެވެ. ކޮންމެ ޔުނިޓެއްގައި 700 އަކަފޫޓުގެ ބިލްޑްއަޕް އޭރިއާއެއް ހިމެނެއެވެ. މީގެ އިތުރުން، ކޮންމެ ޔުނިޓެއްގައި ތިން ކޮޓަރި، ތިން ފާހާނާ އަދި އެހެނިހެން ވަސީލަތްތައް ހިމެނެއެވެ.
Advertisement
މި މަޝްރޫޢުގެ ދަށުން ޕާކެއް އަދި ވެހިކަލް ޕާކިންގ އޭރިއާއެއް ވެސް ގާއިމްކުރެވޭނެއެވެ. މިއީ ސަރުކާރުން ކުރިއަށްގެންދާ ހައުސިން މަޝްރޫޢުތަކުގެ ތެރެއިން އެއް މަޝްރޫޢެވެ.
ސަރުކާރުން މިހާރު ވަނީ ހުއްޓިފައިވާ މަޝްރޫޢުތައް އަވަސްކުރުމަށް މަސައްކަތްތަކެއް ފަށާފައެވެ. މިގޮތުން، ވިލިނގިލީ ހައުސިން މަޝްރޫޢުގެ މަސައްކަތްވެސް އަވަސްކުރުމަށް މަސައްކަތް ކުރަމުންދާކަމަށް މިނިސްޓްރީން ބުނެފައިވެއެވެ.
