މާލޭ ސިޓީ ކައުންސިލްގެ އިލެކްޓްރީޝަން ތަސްލީމް މުޙައްމަދު ގެއްލިގެން އިންޓަޕޯލް ޔެލޯ ނޯޓިސްއަކަށް ފުލުހުން އެދިފައިވާ ކަމަށް މިއަދު ފުލުހުން ނެރުނު ބަޔާނެއްގައި ބުނެފައިވެއެވެ.

ފުލުހުންގެ ބަޔާނުގައި ބުނެފައިވާ ގޮތުގައި، ތަސްލީމް ގެއްލިފައިވަނީ އޮގަސްޓު މަހުގެ 30 ވަނަ ދުވަހު ހުވަފެންފުށި ކައިރީގައި އޮތް ފަސްގަނޑަކަށް ކުރި ދަތުރެއްގައެވެ. އެންމެ ފަހުން ތަސްލީމް ފެނިފައިވަނީ އެ ދުވަހުގެ ހެނދުނު 7:45 އާއި 9:00 އާ ދެމެދުގެ ވަގުތެއްގައި ކަމަށް ބަޔާނުގައި ބުނެފައިވެއެވެ.

ތަސްލީމް ގެއްލުނު ފަހުން، ފުލުހުންނާއި މޯލްޑިވްސް ނޭޝަނަލް ޑިފެންސް ފޯސްގެ ޑައިވިންގ ޓީމުން ވަނީ ފުޅާ ދާއިރާއެއްގައި ހޯދުމުގެ މަސައްކަތް ކޮށްފައެވެ. އަދި މި މައްސަލައާ ގުޅިގެން ދަތުރުގެ ބައިވެރިންނާއި އެހެން ގްރޫޕެއްގެ 12 މީހުންނާ ސުވާލުކޮށްފައިވާ ކަމަށްވެސް ފުލުހުން ހާމަކޮށްފައިވެއެވެ.

ތަސްލީމް ހޯދުމަށް ކުރެވޭ މަސައްކަތްތައް އިތުރަށް ހަރުދަނާކުރުމުގެ ގޮތުން، އިންޓަޕޯލް ޔެލޯ ނޯޓިސްއަކަށް އެދިފައިވާ ކަމަށް ފުލުހުން ބުނެފައިވެއެވެ. މި ނޯޓިސްގެ ސަބަބުން، ބައިނަލްއަޤްވާމީ ފެންވަރުގައި ތަސްލީމް ހޯދުމުގެ މަސައްކަތަށް އެހީތެރިކަން ލިބިގެންދާނެ ކަމަށް އުންމީދުކުރެވޭ ކަމަށް ފުލުހުން ބުންޏެވެ.

އެގޮތުން، ފުލުހުން މި މައްސަލަ ތަޙްޤީޤުކުރަމުންދާ ކަމަށާއި، އިތުރު މަޢުލޫމާތު ލިބުމުން އާންމުކުރާނެ ކަމަށް ބަޔާނުގައި ބުނެފައިވެއެވެ.