އިދިކޮޅު މައި ޕާޓީ، މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން ޒިންމާދާރު އޮޕޮޒިޝަން ޕާޓީއެއްގެ މަސައްކަތް ނުކުރާ ކަމަށް ރައްޔިތުންގެ މަޖިލީހުގެ ގެމަނަފުށީ ދާއިރާގެ މެމްބަރު އަސަދުﷲ ޝިހާބް ވިދާޅުވެއްޖެއެވެ.

"އަސްލު ޓީވީ" ގެ ޕްރޮގްރާމެއްގައި ވާހަކަދައްކަވަމުން އަސަދުﷲ ވިދާޅުވީ ސަރުކާރު ޖަވާބުދާރީ ކުރުވުމަށް އިދިކޮޅު މެމްބަރުން މިހާރަށްވުރެ އިތުރުވާން ޖެހޭނެ ކަމަށް ޤަބޫލު ނުކުރައްވާ ކަމަށާއި އެމްޑީޕީއަށް ވުރެ މާ ރަނގަޅަށް ސަރުކާރު ޖަވާބުދާރީ ކުރުވުމުގެ މަސައްކަތް މިހާރު ތިބި ޕީޕީއެމް / ޕީއެންސީގެ މެމްބަރުން ވެސް ކުރަމުން އަންނަ ކަމަށެވެ.

އަސަދުﷲ ވިދާޅުވީ ސަރުކާރު ޖަވާބުދާރީ ކުރުވާކަމަށް ބުނެ ރައްޔިތުންނަށް އެމްޑީޕީން ދައްކަން އުޅޭ މަންޒަރަކީ ވަޒީރަކު މަޖިލީހަށް ހާޒިރުކޮށްގެން ވަކި ރަށެއްގެ ފުޓުބޯޅަ ދަނޑުގެ ލައިޓް ނުޖެހި ހުރީ ކީއްވެތޯ ސުވާލުކުރުން ކަމަށެވެ. އަދި މިއީ ސަރުކާރު ޖަވާބުދާރީ ކުރުވުން ނޫން ކަމަށާއި، ސަރުކާރު ޖަވާބުދާރީ ކުރުވަން ޖެހޭނީ އެޔަށްވުރެ ބޮޑެތި މަސައްކަތްތަކެއް ކޮށްގެން ކަމަށް އަސަދުﷲ ވިދާޅުވިއެވެ.

އަސަދުﷲ ވިދާޅުވީ އެފަދަ އެއްވެސް ބޮޑު މަސައްކަތެއް އެމްޑީޕީން ނުކުރާ ކަމަށާއި، މަޖިލީހުގެ މެޖޯރިޓީ ނެތުމުން ސަރުކާރު ޖަވާބުދާރީ ނުކުރެވޭކަމަށް އެބޭފުޅުންނަށް ބުނެވެން ވެސް އޮންނާނީ ކޮންމެވެސް މަސައްކަތެއް ކޮށްގެން ކަމަށެވެ.

މީގެ އިތުރުން އެމްޑީޕީން ހަމައެކަނި ކުރާ ކަމަކީ ސަރުކާރާ ގުޅޭ ގޮތުން ދޮގު ވާހަކަތައް ފެތުރުން ކަމަށާއި، އެފަދަ ވާހަކަތައް ފެތުރުމަށް އެބޭފުޅުން ގިނަ މެމްބަރުން ބޭނުންވާނަމަ އެއީ އެއްވެސް ވަރަކަށް ހަމަޖެހޭ ވާހަކައެއް ނޫން ކަމަށް އަސަދުﷲ ވިދާޅުވިއެވެ.

އަސަދުﷲ ވިދާޅުވީ ޕީޕީއެމް / ޕީއެންސީގެ މެމްބަރުން ތިބީ ރައްޔިތުންނަށް އެތައް ވަޢުދުތަކެއްވެފައި ކަމަށާއި، ރައްޔިތުންގެ އުންމީދުތައް މި ސަރުކާރުން ފުނޑުފުނޑު ނުކޮށްލާނެ ކަމަށެވެ. އަދި ރައްޔިތުންނަށް ވެފައި ހުރި ހުރިހާ ވަޢުދުތަކެއް ވެސް ރަނުން ރަނަށް ފުއްދުމުގެ މަސައްކަތް ސަރުކާރުގެ މެމްބަރުން ކުރަމުން އަންނަ ކަމަށް އަސަދުﷲ ވިދާޅުވިއެވެ.