މާލޭ ބްރިޖާއި ހަލިމަގުން ސައިކަލުގައި ގިނަ މާގަސްތަކެއް އުފުލަމުން ދިޔަ މީހަކާމެދު ފުލުހުން ފިޔަވަޅު އަޅައިފިއެވެ. މި މަންޒަރު ދައްކުވައިދޭ ވީޑިއޯއެއް މީސްމީޑިއާގައި ފެތުރުމާ ގުޅިގެން ފުލުހުން ވަނީ މި މައްސަލަ ބަލައި، އެ ފަރާތާމެދު ފިޔަވަޅު އަޅާފައެވެ.

ސޯޝަލްމީޑިއާގައި ފެތުރުނު ވީޑިއޯގައި ފެންނަނީ ސައިކަލުގެ ކުރިމަތީގައާއި، ފަހަތުގައާއި އަދި ދެ އަރިމަތީގައި މާގަސްތައް އަޅުވައިގެން ދުއްވަމުންދާ މަންޒަރެވެ. މި ވީޑިއޯ ފެތުރުމާ ގުޅިގެން ގިނަ ބަޔަކު ވަނީ މިއީ ނުރައްކާތެރި އަދި ޤާނޫނާ ޚިލާފު ޢަމަލެއްކަމަށް ފާހަގަކޮށްފައެވެ.

މޯލްޑިވްސް ޕޮލިސް ސަރވިސްގެ ފަރާތުން މި މައްސަލައާ ގުޅޭގޮތުން ނެރުނު ބަޔާނެއްގައި ބުނެފައިވަނީ މިފަދަ ޢަމަލުތަކަކީ ވަރަށް ނުރައްކާތެރި ކަމެއް ކަމަށެވެ. އަދި މިފަދަ ޢަމަލުތަކުން ދުރުހެލިވުމަށް އާންމުންނަށް އިލްތިމާސްކުރާ ކަމަށްވެސް ފުލުހުންގެ ބަޔާނުގައި ވެއެވެ.

"މިފަދަ ގޮތަކަށް އެއްގަމު އުޅަނދު ދުއްވުމަކީ އެ ފަރާތަށާއި އެހެން ފަރާތްތަކަށްވެސް ނުރައްކާވެދާނެ ކަމެކެވެ. އަދި މިއީ ޤާނޫނާ ޚިލާފު ކަމެކެވެ. އެހެންކަމުން މިފަދަ ކަންކަމުން ދުރުހެލިވެ، ރައްކާތެރިކަމާއެކު އުޅަނދުފަހަރު ދުއްވުމަށް އަޅުގަނޑުމެން އާންމުންނަށް އިލްތިމާސް ކުރަމެވެ،" ފުލުހުންގެ ބަޔާނުގައި ބުނެފައިވެއެވެ.

މި މައްސަލައިގައި ފިޔަވަޅު އެޅުނު ފަރާތުގެ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ. ނަމަވެސް މިފަދަ ޢަމަލުތަކަށް ޤާނޫނީ ގޮތުން ފިޔަވަޅު އެޅޭނެކަން ފުލުހުން ވަނީ ހަނދާންކޮށްދީފައެވެ.