ޑޮލަރު ވިއްކުމުގެ ނަމުގައި ސްކޭމްތަކެއް ހިންގަމުން އަންނަ ކަމަށް ފުލުހުން ބުނެފިއެވެ.
ފުލުހުން ނެރުނު ބަޔާނެއްގައި ބުނީ ޑޮލަރު ވިއްކާ ކަމަށް ބުނެ ސޯޝަލް މީޑިއާގެ ވަޞީލަތްތައް މެދުވެރިކޮށް މަކަރާއި ޙީލަތުން ފައިސާ އަތުލުމުގެ ޢަމަލުތައް އިތުރުވަމުން އަންނަ ކަމަށެވެ.
ފުލުހުން ބުނީ ބޭރު ފައިސާ ގަނެވިއްކުމުގެ މުއަމަލާތްތައް ކުރުމުގައި، އިތުބާރުހުރި ޤާނޫނީގޮތުން ހުއްދަ ލިބިފައިވާ ފަރާތްތަކާ މުއާމަލާތް ކުރުމަކީ މިފަދަ ސްކޭމްތަކުގެ ޝިކާރައަކަށްވުމުން ސަލާމަތްވުމަށް އެޅޭނެ މުހިންމު ފިޔަވަޅެއް ކަމަށެވެ.
މިކަމަށް ސަމާލުވުމަށް ފުލުހުން އިލްތިމާސްކޮށްފައި މިވަނީ ޑޮލަރުގެ ތާށިކަމުގެ ސަބަބުން ކަޅު ބާޒާރުގައި ޑޮލަރު ވިއްކުމުގެ މައްސަލަ އިތުރުވެފައިވާ ދަނޑިވަޅެއްގައެވެ. އެގޮތުން ޓެލެގްރާމް، ފޭސްބުކް އަދި ވައިބަރ ފަދަ އޮންލައިން ޕްލެޓްފޯމްތަކުގައި މިފަދަ ސްކޭމްތައް ހިންގާ މިންވަރު އިތުރުވަމުން އަންނަ ކަން ފުލުހުންގެ ތަފާސްހިސާބުތަކުން ހާމަވެއެވެ.
ފުލުހުން އާންމުކޮށްފައިވާ ތަފާސްހިސާބުތައް ދައްކާ ގޮތުން މިދިޔަ މަހު އެކަނިވެސް މަކަރާއި ޙީލަތުގެ 37 މައްސަލައެއް ވަނީ ރިޕޯޓުކޮށްފައެވެ.
