ޔޫއެފާ ނޭޝަންސް ލީގުގައި ކްރޮއޭޝިއާ ކޮޅަށް ޖެހި ގޯލާއެކު ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އޭނާގެ ކެރިއަރުގައި 900 ވަނަ ގޯލު ހަމަކޮށްފިއެވެ.

ފަސް ފަހަރު ބެލޮންޑިއޯ ހޯދައިފައިވާ ރޮނާލްޑޯއާ އެންމެ ކައިރިން ވާދަކުރަނީ އޭނާއާ އެންމެ ވާދަވެރި އާޖެންޓީނާގެ ތަރި ލިއޮނަލް މެސީއެވެ. މިހާތަނަށް މެސީ 842 ގޯލު ކާމިޔާބުކޮށްފައިވާއިރު ތިން ވަނައިގައި ބްރެޒިލްގެ ލެޖެންޑު ޕެލޭ އޮތީ 765 ގޯލާއެކު އެވެ.

ކެރިއަރުގައި 800 ވަނަ ގޯލު ޖެހި ފުރަތަމަ ކުޅުންތެރިއާގެ ރެކޯޑުވެސް އޮތީ ރޮނާލްޑޯ އަތުގައެވެ. އޭނާ އެ ރެކޯޑު ހަދާފައިވަނީ 2021 ވަނަ އަހަރު މެންޗެސްޓަރ ޔުނައިޓެޑުގައި، އާސެނަލްއާ ދެކޮޅަށް ކުޅުނު މެޗެއްގައެވެ.

_{ކެރިއަރުގެ 800 ވަނަ ގޯލު ޖެހުމަށްފަހު ރޮނާލްޑޯ އުފާ ފާޅުކުރަނީ}

209 މެޗު ކުޅެ 131 ގޯލު ކާމިޔާބުކޮށް ބައިނަލްއަޤުވާމީ އެންމެ ގިނަ ގޯލު ޖެހި ކުޅުންތެރިޔާއަށް ރޮނާލްޑޯ ވެފައިވާއިރު ލިސްޓުގެ ދެވަނައިގައި 109 ގޯލާއެކު އޮތީ ލިއޮނަލް މެސީއެވެ. އަދި ތިން ވަނައިގައި އީރާނުގެ ލެޖެންޑު އަލީ ދާއީ އޮތީ 108 ގޯލާއެކުއެވެ.

ސައުދީ ލީގުގައި ކުޅެމުން އަންނަ އަލް-ނަސްރުގެ ފޯވާޑު މިހާތަނަށް ކުލަބު ކެރިއަރުގައި 769 ގޯލު ކާމިޔާބުކޮށްފައިވާއިރު އޭނާ އެންމެ ފުރަތަމަ ކުޅެފައިވަނީ ޕޯޗުގަލްގެ ސްޕޯޓިންގ ލިސްބަން އަށެވެ. 2003 ވަނަ އަހަރު މެންޗެސްޓަރ އުނައިޓެޑަށް ކުޅުމަށްފަހު، ރެކޯޑް އަގެއްގައި 2009 ވަނަ އަހަރު ރިއަލް މެޑްރިޑާ ގުޅިފައިވަނީ 80 މިލިއަން ޔޫރޯއަށެވެ. 2018 ވަނަ އަހަރު އިޓަލީގެ ޔުވެންޓަސްއަށް ކުޅުމަށްފަހު އޭނާ ވަނީ 2021 ވަނަ އަހަރު އަލުން އަނބުރާ މެންޗެސްޓަރ އުނައިޓެޑަށް ސޮއިކޮށްފައެވެ. އަދި 2023 ވަނަ އަހަރު ސައުދީގެ އަލް-ނަސްރަށް އޭނާ ކުޅެން ފެށީ އަހަރަކު 200 މިލިއަން ޔޫރޯ ލިބޭ ގޮތަށެވެ. އެ ކުލަބުގައި މިހާތަނަށް އޭނާ ވަނީ 66 ގޯލު ކާމިޔާބުކޮށްފައެވެ.

900 ވަނަ ގޯލު ކާމިޔާބުކުރި މި ތާރީހީ ލަނޑު ރޮނާލްޑޯ ކާމިޔާބުކޮށްފައިވަނީ މެޗުގެ 34 ވަނަ މިނެޓުގައި ނޫނޭ މެންޑެސް ނަގައިދިން ކްރޮހަކުންނެވެ. މި މެޗު ޕޯޗުގަލް ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ. ޕޯޗުގަލްގެ ފުރަތަމަ ގޯލު 7 ވަނަ މިނެޓުގައި ކާމިޔާބުކޮށްފައިވަނީ ޑިފެންޑަރު ޑަލޮޓެވެ. ކްރޮއޭޝިއާގެ ހަމަ އެކަނި ގޯލަކީ މެޗުގެ 41 ވަނަ މިނެޓުގައި ޑަލޮޓު އަތުން ބައިކޮޅަށް ވަތް ގޯލެކެވެ.