ސައޫދީ ޕްރޯ ލީގުގައި އަލް ރިޔާޟްއާ ދެކޮޅަށް ކުޅުނު މެޗުގައި ލަނޑު ޖަހައި، ދުނިޔޭގެ ފުޓްބޯޅައިގެ ތާރީޚުގައި ވިދިވިދިގެން 25 ސީޒަނުގައި ލަނޑު ޖެހި ފުރަތަމަ ކުޅުންތެރިޔާގެ ޝަރަފު ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ހޯދައިފިއެވެ.
ހުކުރު ދުވަހުގެ ރޭ ކުޅުނު މި މެޗު އަލް ނަޞްރުން ކާމިޔާބުކުރީ 4-0 ގެ ނަތީޖާއަކުންނެވެ. މި މެޗުގެ 62 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އުމުރުން 41 އަހަރުގެ ރޮނާލްޑޯ، ޓީމުގެ ހަތަރުވަނަ ލަނޑު ކާމިޔާބުކުރީ މެޗުގެ 83 ވަނަ މިނެޓުގައެވެ. މިއީ އައިމަން ޔަޙްޔާ ނަގައިދިން ހުރަހަކުން އޭނާ ވައަތު ފައިން ޖެހި ލަނޑެކެވެ. މިއާއެކު ރޮނާލްޑޯގެ ކެރިއަރުގައި ޖެހި ޖުމްލަ ލަނޑުގެ އަދަދު ވަނީ 977 އަށް އަރައިފައެވެ.
މި ރެކޯޑާއެކު ރޮނާލްޑޯ ވަނީ މީގެ ކުރިން ސްވިޑެންގެ ޒްލަޓާން އިބްރަހިމޮވިޗް ހަދާފައިވާ 24 ސީޒަނުގެ ރެކޯޑު މުގުރާލައިފައެވެ. ރޮނާލްޑޯގެ މި ދިގު ދަތުރު ފެށުނީ 2002-2003 ވަނަ އަހަރުގެ ސީޒަނުގައި ސްޕޯޓިންގ ސީޕީ އިންނެވެ. އޭގެ ފަހުން މެންޗެސްޓަރ ޔުނައިޓެޑް، ރެއާލް މެޑްރިޑް، ޔުވެންޓަސް އަދި މިހާރު ސައޫދީގެ އަލް ނަޞްރުގައި ވޭތުކުރި ކޮންމެ ސީޒަނެއްގައިވެސް އޭނާ ވަނީ ލަނޑު ޖަހައިފައެވެ. މިއީ ވޭތުވެދިޔަ 25 އަހަރު ތެރޭގައި އެއްވެސް މެދުކެނޑުމެއް ނެތި އޭނާ ދައްކަމުން އަންނަ މޮޅު ކުޅުމުގެ ހެއްކެކެވެ.
Advertisement
މި މެޗުގައި އަލް ނަޞްރުގެ އަނެއް ތިން ލަނޑު ޖަހައިދިނީ ޢަބްދުލްއިލާހް އަލް-އަމްރީ، އަންޖެލޯ ގެބްރިއަލް އަދި ޔާއޯ ފެލިކްސް އެވެ.
މި ލަނޑާއެކު ރޮނާލްޑޯ މިހާރު އަމާޒު ހިފާފައިވަނީ ކެރިއަރުގައި 1,000 ލަނޑު ހަމަކުރުމަށެވެ. އެ ތާރީޚީ ލަނޑުދަނޑިއާ ހަމައަށް ވާސިލްވުމަށް އޭނާއަށް މިހާރު ބޭނުންވަނީ އެންމެ 23 ލަނޑެވެ. އުމުރުން ދުވަސްވީ ނަމަވެސް، ފިޓްނަސް މަތީ ދަރަޖައެއްގައި ދަމަހައްޓައިގެން ރޮނާލްޑޯ ދައްކަމުންދާ ކުޅުމަކީ ފުޓްބޯޅަ ދުނިޔެ އަދިވެސް ހައިރާންކުރުވަމުން އަންނަ ކަމެކެވެ.
