ދެކުނު އެމެރިކާގެ ގައުމެއް ކަމަށްވާ ޕެރޫގެ މެދުތެރޭގައި އޮންނަ ޖުނިން ސަރަހައްދަށް 6.9 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ.
އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން މައުލޫމާތު ދޭ ގޮތުގައި، މި ބިންހެލުން އައިސްފައިވަނީ ޖުނިން ސަރަހައްދުގެ އޮންޑޯރެސްގެ ހުޅަނގު އުތުރުން 22 ކިލޯމީޓަރު ދުރުގައި، ބިމުގެ 108 އާއި 142 ކިލޯމީޓަރާ ދެމެދުގެ ފުންމިނުގައެވެ.
މި ބިންހެލުމުގެ ލޮޅުން ޕެރޫގެ ވެރިރަށް ލީމާއަށްވެސް ވަރަށް ބާރަށް އިހުސާސް ކުރެވުނެވެ. ލޮޅުމާއެކު އުފެދުނު ބިރުވެރިކަމުގެ ސަބަބުން ލީމާގެ ގިނަ އަދަދެއްގެ ރައްޔިތުން ވަނީ ގެތަކުން ނުކުމެ މަގުތަކަށް ޖަމާވެފައެވެ.
ޕެރޫއަކީ ދުނިޔޭގެ އެންމެ ގިނައިން ބިންހެލުން އަންނަ އަދި އަލިފާންފަރުބަދަތައް ގިނަ "ރިންގް އޮފް ފަޔަރ" ސަރަހައްދުގައި އޮންނަ ގައުމެކެވެ. މީގެ ކުރިން މިދިޔަ އޮގަސްޓް މަހުވެސް އެ ސަރަހައްދަށް 6.7 މެގްނިޓިއުޑްގެ ބިންހެލުމެއް އައިސް ބައެއް ގެތަކާއި ސްކޫލްތަކަށް ގެއްލުން ލިބިފައިވެއެވެ.



