އަމީނީމަގުގެ ދެވަނަ ސެގްމެންޓު މަރާމާތު ކުރުމުގެ މަސައްކަތް ކުރިއަށް ގެންދިއުމަށްޓަކައި އެ ސަރަހައްދު ބަންދުކޮށް، ޓްރެފިކަށް ބަދަލުތައް ގެނެސްފި އެވެ.
މި ސަރަހައްދުގެ ޓްރެފިކް ފްލޯއަށް އަންނަ ބަދަލުތަކާ ގުޅޭގޮތުން ފުލުހުން ނެރުނު ބަޔާނުގައި ބުނީ، އާދީއްތަ ދުވަހު އަމީނީ މަގުގެ ދެވަނަ ސެގްމެންޓުގެ މަސައްކަތް ފެށުމަށް ހަމަޖެހިފައިވާ ކަމަށެވެ. އެހެންކަމުން މިރޭ ދަންވަރު 12:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލު ގެންނަން ނިންމާފައިވާ ކަމަށް ފުލުހުން ހާމަކުރި އެވެ. މީގެއިތުރުން، މަގު މަރާމާތުކުރާ ސަރަހައްދުގައި ޕާކް ކޮށްފައިވާ އެންމެހައި އުޅަނދުތައް ނެގުމަށް ވެސް ފުލުހުން ވަނީ އިލްތިމާސްކޮށްފަ އެވެ.
ފުލުހުން އާންމުކޮށްފައިވާ ޓްރެފިކް ޗާޓުން ދައްކާ ގޮތުގައި، މި މަރާމާތުގެ މަސައްކަތަށް ބަންދުކުރުމަށް ހަމަޖެހިފައިވަނީ އަމީނީ މަގު އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށެވެ. މި ސަރަހައްދު ބަންދުކޮށްފައިވާ ވަގުތުތަކުގައި، އެ ސަރަހައްދާ ގުޅޭ ބައެއް މަގުތަކުން ދުއްވުން މަނާވާނެ އެވެ. އަދި ބައެއް މަގުތަކަށް ހަތަރު ފުރޮޅުލީ އުޅަނދު ވަނުން ވެސް މަނާވާނެ ކަމަށް ފުލުހުން މައުލޫމާތު ދިނެވެ.
Advertisement
މި ގެނެވޭ ބަދަލުތަކުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށް މައާފަށް އެދޭ ކަމަށް ފުލުހުން ވަނީ ބުނެފަ އެވެ. އަދި މިފަދަ ކަންކަމުގައި އަބަދުވެސް ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް، ފުލުހުންގެ ވަނީ އާންމުންނަށް ޝުކުރު އަދާކޮށްފަ އެވެ.
