ދިވެހިރާއްޖޭގެ މަގުމަތިތަކާއި އާންމުކޮށް މީހުން އެއްވެ އުޅޭ ތަންތަނުގައި، އިޖުތިމާއީ އަދި އަދަބުއަހުލާގީ މިންގަނޑުތަކާ ހިލާފަށް އަމަލުކުރާ ފަރާތްތަކާ މެދު ގާނޫނީ ފިޔަވަޅު އަޅަން ފަށާނެ ކަމަށް މޯލްޑިވްސް ޕޮލިސް ސާވިސް އިން ހާމަކޮށްފިއެވެ.
ފުލުހުން ބުނި ގޮތުގައި، ދިވެހިރާއްޖެއަށް ޒިޔާރަތްކުރާ ބައެއް ފަތުރުވެރިންނާއި ބިދޭސީން، އާންމު މަގުތަކާއި މީހުން އެއްވެ އުޅޭ އެކި ސަރަހައްދުތަކުގައި އިސްލާމީ ރިވެތި އާދަކާދަތަކާއި މުޖުތަމައުގެ އާންމު މަސްލަހަތާ ހިލާފަށް ބޭއަދަބީ ގޮތްގޮތަށް އުޅެމުންދާކަން ވަނީ ފާހަގަކުރެވިފައެވެ. މިފަދަ އަމަލުތަކަކީ ދިވެހިންގެ ދީނީ އަދި އިޖުތިމާއީ އަގުތަކާ ފުށުއަރާ ކަންކަން ކަމަށް ވެސް ފުލުހުން ފާހަގަކުރެއެވެ.
މިކަމާ ގުޅިގެން ފުލުހުން ވަނީ، އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު 2010 ގެ ދަށުން އެފަދަ ފަރާތްތަކާ މެދު ހަރުކަށި ފިޔަވަޅު އަޅަމުން ގެންދާނެ ކަމުގެ އިންޒާރު ދީފައެވެ.
Advertisement
މީގެއިތުރުން، ފަތުރުވެރިންނާއި ބިދޭސީން ގެންގުޅޭ ފަރާތްތަކުންނާއި ޓޫރިޒަމް ވިޔަފާރި ހިންގާ ފަރާތްތަކުން، ރިސޯޓުތަކާއި ފަތުރުވެރިންނަށް ހާއްސަ ކުރެވިފައިވާ ސަރަހައްދުތަކުން ބޭރުގައި އުޅޭއިރު، އެކަށީގެންވާ ގޮތެއްގައި ނިވާކަން ބޮޑު ހެދުން އެޅުމަށާއި އަދަބުވެރިކޮށް އުޅުމަށް އެފަރާތްތަކަށް އިރުޝާދު ދިނުމަށް ފުލުހުން ވަނީ އިލްތިމާސްކޮށްފައެވެ.
