އީރާނުގެ ބެލިސްޓިކް މިސައިލްތަކުގެ ފަހުގެ ކުރިއެރުންތަކާއި އެކު، ހުޅަނގުގެ އަސްކަރީ ބާރުތަކާއި ދުނިޔޭގެ ސުޕަޕަވަރުންގެ މެދުގައި ބޮޑު ސިހުމަކާއި ކަންބޮޑުވުމެއް އުފެދިއްޖެ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުގައި، އީރާނުގެ މިސައިލް ޓެކްނޮލޮޖީ އަށް ގެނެސްފައިވާ އިންގިލާބީ ބަދަލުތަކުގެ ސަބަބުން، ހުޅަނގުން ބޭނުންކުރާ އެންމެ ޒަމާނީ ދިފާއީ ނިޒާމުތަކަށް ނޭނގި، އަމާޒުތަކަށް ހަމަލާދިނުމުގެ ފުރުސަތު އީރާނަށް މިހާރު ވަނީ ތަނަވަސްވެފައެވެ. މިއީ މެދުއިރުމަތީގެ އަސްކަރީ ތިލަފަތް މުޅިން ބަދަލުކޮށްލި ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.
އާންމުވެފައިވާ އަސްކަރީ ރިޕޯޓްތައް ބުނާގޮތުން، އީރާނުގެ ބެލިސްޓިކް މިސައިލްތަކުގައި ޖޭމްކުރުމާ ދެކޮޅު (އެންޓި-ޖޭމިންގ) ކުރިއަރާފައިވާ ގާބިލުކަން ހުރިކަން ފުރަތަމަ ފަހަރަށް މިވަނީ ސާބިތުވެފައެވެ. ވަކިން ހާއްސަކޮށް، މިސައިލްގެ ސައްހަކަން އިތުރުކުރުމަށްޓަކައި އޭގެ ވޯހެޑްތަކުގައި 4-އެލެމެންޓްގެ ޖީއެންއެސްއެސް/ޖީޕީއެސް މޮޑިއުލްއެއް ހަރުކޮށްފައިވާކަން ވަނީ ހާމަވެފައެވެ.
Advertisement
އީރާނުގެ މިސައިލް ޖޭމް ނުކުރެވޭ ގޮތަށް ހަރުކޮށްފައިވާ ޓެކްނޮލޮޖީ.
މިއީ ފާއިތުވި މަސްތަކުގައި އީރާނުގެ ބެލިސްޓިކް މިސައިލްތަކުގެ އަމާޒަށް ވާސިލްވުމުގެ ސައްހަކަމާއި، އޭގެ ނުރައްކާތެރިކަން އިންތިހާއަށް އިތުރުވެގެންދިޔަ މައިގަނޑު ސަބަބެވެ.
މި އައު ޓެކްނޮލޮޖީގެ ސަބަބުން ހުޅަނގުގެ ގައުމުތަކުން ބޭނުންކުރާ ސިގްނަލް ބްލޮކްކުރާ ނުވަތަ މިސައިލްގެ މަގު އޮޅުވާލާ އިލެކްޓްރޯނިކް ހަނގުރާމައިގެ ނިޒާމުތައް މިހާރު ވަނީ ނާކާމިޔާބުވެފައެވެ.
އީރާނުގެ މިސައިލްތަކަށް ހުރަސްއެޅުމަކީ އެމެރިކާ ފަދަ ސުޕަޕަވަރުންނަށް ވެސް ބޮޑު ގޮންޖެހުމަކަށް ވެފައިވާއިރު، މިއީ ހުޅަނގުގެ އަސްކަރީ ނުފޫޒަށް އޮތް ބޮޑު ބިރެކެވެ. މި ސަބަބަށްޓަކައި، އީރާނުގެ މިސައިލް ޕްރޮގްރާމް ހުއްޓުވުމަށް ބައިނަލްއަގުވާމީ މައިދާނުގައި އައު ފިޔަވަޅުތަކެއް އެޅުމަށް ސުޕަޕަވަރުން ދަނީ ކުއްލި މަޝްވަރާތަކެއް ކުރަމުން ކަމަށް ރިޕޯޓުތައް ބުނެއެވެ.
