އެމެރިކާގެ ރައީސް ޑޮނަލްޑް ޓްރަމްޕް، އިރާގުގެ ބޮޑުވަޒީރު އަލީ އަލް-ޒައިދީ މެދުވެރިކޮށް އީރާނަށް ހުށަހެޅުއްވި ހަނގުރާމަ ހުއްޓާލުމުގެ ކުއްލި ހުށަހެޅުން އީރާނުން ރަސްމީކޮށް ރައްދުކޮށްފިއެވެ. ނިއު ޔޯކް ޓައިމްސް އިން ރިޕޯޓްކޮށްފައިވާ ގޮތުގައި، މި ސިއްރު މެސެޖު އީރާނުގެ ވެރިރަށް ތެހެރާނަށް ރައްދުކޮށްދެއްވީ ވައިޓް ހައުސްގައި ރައީސް ޓްރަމްޕާ ބައްދަލުކުރެއްވުމަށްފަހު ސީދާ ދަތުރުފުޅެއް ކުރެއްވި އިރާގުގެ ބޮޑުވަޒީރެވެ. ނަމަވެސް، ދެގައުމުގެ ދެމެދުގައި އުފެދިފައިވާ އަސްކަރީ ނުތަނަވަސްކަން ކުޑަކުރުމަށް އެމެރިކާއިން ކުރި މި މަސައްކަތް ވަނީ ނާކާމިޔާބުވެފައެވެ.

އީރާނުން މި ހުށަހެޅުން ގަބޫލުނުކުރި މައިގަނޑު ސަބަބަކީ އެމެރިކާއިން ހުށަހެޅި ވަގުތީ އެއްބަސްވުމުގައި އެ ގައުމުން ބޭނުންވާ މުހިންމު ކަންތައްތަކެއް ހިމަނާފައި ނެތުމުންނެވެ. ހާއްސަކޮށް، ދުނިޔޭގެ ތެލުގެ ވިޔަފާރީގެ މައި ހަބެއް ކަމަށްވާ ހުރްމުޒް ކަނޑުއޮޅީގެ ކޮންޓްރޯލް ދެން އޮންނާނެ ގޮތުގެ ސާފު އިތުބާރެއް އެމެރިކާއަށް ދެވިފައެއް ނުވެއެވެ. އީރާނުގެ ރައީސް މަސްއޫދު ޕެޒެޝްކިއަން އާއި ބައްދަލުކުރެއްވުމަށްފަހު އީރާނުގެ އޮފިޝަލުން ހާމަކުރި ގޮތުގައި، ދާއިމީ ހައްލެއް ނެތް ސިޔާސީ "ފޭކު" އެއްބަސްވުންތަކެއްގައި އެ ގައުމުން ސޮއެއް ނުކުރާނެއެވެ.

މިކަމާ ގުޅޭގޮތުން އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވީ، މައްސަލައަކީ މެދުވެރިއަކު މެސެޖު ރައްދުކުރުން ނޫން ކަމަށާއި، އަސްލު މައްސަލައަކީ އެމެރިކާގެ ހަމަޖެހުމެއް ނެތް އަދި ނުފޫޒު ފޯރުވުމުގެ ސިޔާސަތު ކަމަށެވެ.

އެމެރިކާއިން އެއްކޮޅުން ސުލްހައަށް ގޮވާލާއިރު، އަނެއްކޮޅުން ދަތިކުރުމުގެ ފިޔަވަޅުތައް ވަރުގަދަކޮށް އަސްކަރީ ބިރުދެއްކުންތައް ކުރިއަށްގެންދާ ކަމަށް އީރާނުން ތުހުމަތުކުރެއެވެ. މި ސަބަބަށްޓަކައި އެމެރިކާގެ ނިޔަތާމެދު އިތުބާރެއް ނެތް ކަމަށް އީރާނުގެ ހާރިޖިއްޔާއިން ވަނީ ހާމަކޮށްފައެވެ.

މި ހުށަހެޅުން އީރާނުން ބޭރުކޮށްލުމާ އެކު، މެދުއިރުމަތީގެ މަސްރަހު އިތުރަށް ގޯސްވެ، ބޮޑު ހަނގުރާމައެއްގެ ބިރު ދަނީ ބޮޑުވަމުންނެވެ. އެމެރިކާއިން ދީފާނެ ހަމަލާއަކަށް ތައްޔާރުވުމުގެ ގޮތުން އީރާނުގެ އަސްކަރިއްޔާ ވަނީ މަތީ އެލާޓަކަށް ގެނެސްފައެވެ. އަދި އެމެރިކާއިން އިސްވެ ހަމަލާއެއް ދީފިނަމަ، އިޒްރޭލުގެ ޓެލް އަވީވަށް ސީދާ މިސައިލް ހަމަލާތައް ދީ، ޔަމަނުގެ ހޫތީން މެދުވެރިކޮށް ބާބުލް މަންދަބު ކަނޑުއޮޅި އެއްކޮށް ބަންދުކޮށްލާނެ ކަމުގެ ހަރުކަށި އިންޒާރުވެސް އީރާނުން ވަނީ ދީފައެވެ.