މެދުއިރުމަތީގެ ސަރަހައްދީ ނުތަނަވަސްކަން ބޮޑުވެ، ސަލާމަތީ ގޮތުން ކުރިމަތިވަމުންދާ ގޮންޖެހުންތަކާ ގުޅިގެން ކުވެއިތުން ޕާކިސްތާނާއެކު އޮތް އަސްކަރީ ގުޅުން ބޮޑުތަނުން ފުޅާކުރުމަށް މަޝްވަރާ ފަށައިފއެވެ.

ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، ކުވެއިތާއި ޕާކިސްތާނާ ދެމެދު މިހާރު ކުރިއަށްދާ މަޝްވަރާތަކުގައި ކުވެއިތުން ވަނީ އެ ގައުމުގެ ދިފާއީ ބާރު ވަރުގަދަކުރުމަށް ބޭނުންވާ މުހިންމު ކަންތައްތަކެއް ހިމެނޭ " ބަރޯސާވުމުގެ ބަދަލުގައި، އިސްލާމީ ބޮޑު އަސްކަރީ ބާރެއްގެ އެހީތެރިކަމާއެކު ދިފާއީ ނިޒާމު ފުޅާކުރުމަށް ކުވެއިތުން ކުރާ މަސައްކަތެކެވެ. މި މަޝްވަރާތަކުގައި ކުވެއިތުން އެދިފައިވަނީ ޕާކިސްތާނުން ސައުދީ އަރަބިއްޔާއާއެކު ގާއިމުކޮށްފައިވާ ފަދަ ވަރުގަދަ ދިފާއީ އެއްބަސްވުމެކެވެ.

ކުވެއިތުގެ ހުށަހެޅުމުގައި ޕާކިސްތާނުގެ އެތައް ހާސް ސިފައިންނެއް ކުވެއިތުގެ ބިމުގައި ގާއިމުވެ ތިބުމާއި، ފައިޓަރު ޖެޓުތަކާއި، ޑްރޯންތަކުގެ އިތުރުން ވައިގެ ދިފާއީ ނިޒާމުތައް ކުވެއިތުގައި ބެހެއްޓުން ހިމެނެއެވެ. ދެ ގައުމުގެ މެދުގައި 2023 ވަނަ އަހަރުން ފެށިގެން އަސްކަރީ ތަމްރީނުތަކަށް ޚާއްސަ އެއްބަސްވުމެއް އޮތް ނަމަވެސް، ކުވެއިތުން މިހާރު ބޭނުންވަނީ އެއަށްވުރެ މާ ފުޅާ އަދި އަމަލީ ގޮތުން ގައުމު ދިފާއުކޮށްދޭނެ ފަދަ ބާރެކެވެ.

ނަމަވެސް، މި ބޮޑު ހުށަހެޅުމާ މެދު ޕާކިސްތާނުން ގެންގުޅެނީ ވަރަށް ސަމާލު ވިސްނުމެކެވެ. ޕާކިސްތާނުގެ ސެކިއުރިޓީ އޮފިޝަލުން ވިދާޅުވާ ގޮތުގައި، ކުވެއިތުން ހުރިހާ ވަސީލަތްތަކަކަށް އެދިފައިވީ ނަމަވެސް، މިވަގުތު ކުވެއިތަށް "ހަނގުރާމަވެރި ސިފައިން ނުވަތަ ފައިޓަރު ޖެޓުތައް ފޮނުވުމަކަށް ޕާކިސްތާނުން ގަބޫލެއް ނުވެއެވެ. ސަބަބަކީ ސަރަހައްދީ ގޮތުން އީރާނާއި އެމެރިކާއާ ދެމެދު އޮތް ނުތަނަވަސްކަމުގެ ތެރެއަށް ޕާކިސްތާނުގެ އަސްކަރިއްޔާ ސީދާ ގޮތެއްގައި ވަންނަން ބޭނުންނުވުމާއި، ބައިނަލްއަގުވާމީ މަސްރަހުގައި މެދުވެރިއެއްގެ ދައުރު އަދާކުރުމަށް ޕާކިސްތާނުން ގެންގުޅޭ ސިޔާސަތެވެ.

އަސްކަރީ އެހީތެރިކަން ހޯދުމުގެ ބަދަލުގައި، ކުވެއިތުން ވަނީ ޕާކިސްތާނަށް އިގްތިސާދީ ގޮތުން ބޮޑެތި ފައިދާތަކެއް ހުށަހަޅާފައެވެ. އޭގެ ތެރޭގައި ޕާކިސްތާނަށް ބޭނުންވާ ހަކަތައިގެ ރައްކާތެރިކަން ކަށަވަރުކޮށްދިނުމާއި، ތެޔޮ ރައްކާކުރާނެ ބޮޑެތި މަރުކަޒުތައް ބިނާކުރުމާއި، އަދި ޕާކިސްތާނުގައި ބޮޑެތި އިންވެސްޓްމަންޓްތައް ކުރުން ހިމެނެއެވެ.