މެދުއިރުމައްޗާއި ގަލްފުގެ ސަރަހައްދުގައި ހިނގަމުންދާ ވަރުގަދަ ހަނގުރާމަތަކާއި ހަމަނުޖެހުންތަކާއި ގުޅިގެން، ފާއިތުވި ތިން އަހަރު ދުވަހުގެ ތެރޭގައި އެމެރިކާގެ 540,000 އަށްވުރެ ގިނަ ސިފައިންނަށް ޖިސްމާނީ އަދި ނަފްސާނީ ގޮތުން ބޮޑެތި އަނިޔާތަކެއް ލިބިފައިވާކަމަށް އެމެރިކާގެ ސިއްހީ އަދި އަސްކަރީ އިދާރާތަކުން ހާމަކޮށްފިއެވެ.

އެމެރިކާގެ ޑިފެންސް ހެލްތު އެޖެންސީ އާއި ޑިޕާޓްމަންޓް އޮފް ވެޓެރަންސް އެފެއާޒްގެ ރިޕޯޓްތައް ބުނާގޮތުން، މި މުއްދަތުގައި ހަނގުރާމައިގެ މައިދާނަށް ނެރުނު އެކްޓިވް-ޑިއުޓީ ސިފައިންގެ ތެރެއިން ވަރަށް ގިނަ ބަޔަކަށް ބޮޑެތި އަނިޔާ ލިބުނު އިރު އޭގެތެރޭގައި ބޮމާއި ބަޑީގެ އުންޑަތަކުގެ ސަބަބުން ލިބުނު ޖިސްމާނީ ޒަޚަމްތަކުގެ އިތުރުން، ހަނގުރާމައިގެ ބިރުވެރި މާހައުލުގެ ސަބަބުން ސިލްސިލާކޮށް ކުރިމަތިވި ނަފްސާނީ ބޮޑެތި އަނިޔާތައް ހިމެނެއެވެ.

އެމެރިކާގެ މެޑިކަލް މަސްދަރުތަކުން ފާހަގަކުރާ ގޮތުގައި، ހަނގުރާމައިގެ މައިދާނުން އެނބުރި އަންނަ ގިނަ ސިފައިންނަށް 'ޕޯސްޓް-ޓްރައުމެޓިކް ސްޓްރެސް ޑިސްއޯޑަރ' އާއި ޑިޕްރެޝަން ފަދަ ނަފްސާނީ ޒަޚަމްތަކާއި ވެސް ކުރިމަތިލާންޖެހިފައިވާއިރު މިއީ އެމީހުންގެ މުޅި ދިރިއުޅުމަށް އޭގެ ނޭދެވޭ އަސަރު ފޯރަމުންދާ އަނިޔާތަކެއް ކަން ފާހަގަ ކޮށްފައި ވެއެވެ.

އެމެރިކާގެ އަސްކަރީ ހޮސްޕިޓަލްތަކުގެ ރެކޯޑްތަކުން ދައްކާގޮތުގައި، އެ މީހުންގެ ސިފައިން ހޮސްޕިޓަލްތަކުގައި އެނދުމަތިކޮށްގެން ދިގު މުއްދަތަކަށް ފަރުވާ ދޭންޖެހޭ އެންމެ ބޮޑު ސަބަބަކީވެސް މި ހަނގުރާމައިގެ ތެރެއިން ލިބުނު މިފަދަ އަނިޔާތަކެވެ.

މީގެ އިތުރުން މެދުއިރުމަތީގެ ހަނގުރާމަވެރި ސަރަހައްދުތަކުން ޒަޚަމްވެގެން ކުއްލި ގޮތަކަށް ވައިގެ މަގުން ގެންނަ ސިފައިންގެ އަދަދު ވެސް ފާއިތުވި އަހަރުތަކުގައި ވަނީ ރެކޯޑް މިންވަރަކަށް މަތިވެފައި ކަމަށް އެމެރިކާގެ މަސްދަރުން ބުނެއެވެ.

މިހާ ގިނަ އަދަދެއްގެ ސިފައިންނަށް އަނިޔާވެ ބޭސްކުރަން ޖެހުމަކީ އެމެރިކާގެ ދިފާއީ ބަޖެޓަށާއި އަސްކަރީ ސިއްހީ ނިޒާމަށް ނުބައްދަލު ބޮޑު ބުރައެއް އުފުލަންޖެހިފައިވާ ކަމެކެވެ.

ހަނގުރާމައިގެ ސަބަބުން ސިފައިންނަށް ލިބެމުންދާ މި ބޮޑެތި ގެއްލުންތަކުގެ ސަބަބުން، މެދުއިރުމަތީގައި އެމެރިކާއިން ގެންގުޅޭ ހަނގުރާމަވެރި ސިޔާސަތުތަކަށް އެގައުމުގެ އެތެރޭގެ ސިޔާސީ މަސްރަހުގައިވެސް ބޮޑެތި ފާޑުކިޔުންތަކެއް ވަނީ އަމާޒުވެފައެވެ.