ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ގަތަރަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މިއަދު މާލެ ވަޑައިގެންފިއެވެ.

ރައީސުލްޖުމްހޫރިއްޔާގެ މި ދަތުރުފުޅަކީ، ގަތަރުގެ ކުރީގެ އަމީރު، ހިޒް ހައިނަސް ޝައިހް ހަމަދު ބިން ހަލީފާ އާލް ޘާނީ، އަވަހާރަވުމާ ގުޅިގެން، އެގައުމުގެ މިހާރުގެ އަމީރު ހިޒް ހައިނަސް ޝައިހް ތަމީމް ބިން ހަމަދު އާލް ޘާނީ އާއި ޝާހީ އާއިލާއަށް އިހުތިރާމު އަދާކުރައްވައި، ތައުޒިޔާ ދެންނެވުމަށް ކުރެއްވި ދަތުރުފުޅެކެވެ.

މި ދަތުރުފުޅުގެ ތެރެއިން ގަތަރުގެ އަމީރު ވަނީ ރައީސް ޑރ. މުހައްމަދު މުއިއްޒުއާ ބައްދަލުކުރައްވާފައެވެ. މި ބައްދަލުވުމުގައި ރައީސް ވަނީ، ކުރީގެ އަމީރު އަވަހާރަވުމުގެ ހިތާމައިގައި ބައިވެރިވެވަޑައިގެން، ދިވެހި ސަރުކާރާއި ދިވެހި ރައްޔިތުންގެ ނަމުގައި ތައުޒިޔާ ވިދާޅުވެފައެވެ. މީގެ އިތުރުން، ދެ ގައުމުގެ ދެމެދުގައި އޮތް ޒަމާންވީ އުހުއްވަތްތެރި ގުޅުމާ މެދު ދެ ބޭފުޅުން މަޝްވަރާކުރައްވައި، އެ ގުޅުން އިތުރަށް ބަދަހިކުރެއްވުމުގެ އަޒުމް އާކުރެއްވިއެވެ.

ގަތަރުގެ ކުރީގެ އަމީރު، ޝައިހް ހަމަދު ބިން ގަލީފާ އާލް ޘާނީއަކީ ރާއްޖޭގެ ތަރައްގީއަށް ފާހަގަކޮށްލެވޭ ފަދަ އެހީތެރިކަމެއް ފޯރުކޮށްދެއްވާފައިވާ ބޭފުޅެކެވެ. އެގޮތުން ގަތަރު އެއަރވޭޒްގެ ދަތުރުތައް ރާއްޖެއަށް ފެށުމާއި، ލ. އަތޮޅުގައި ހަމަދު ބިން ހަލީފާ އަލް ޘާނީ ސްކޫލު ބިނާކުރުމުގެ އިތުރުން، ހުޅުމާލޭގައި މަސްޖިދުއްޝައިހް ގާސިމް ބިން އަލް ޘާނީ ބިނާކުރުން ހިމެނެއެވެ. އެމަނިކުފާނު ވަނީ 2005 ވަނަ އަހަރު ރާއްޖެއަށް ރަސްމީ ދަތުރުފުޅެއްވެސް ކުރައްވާފައެވެ.

ރައީސުލްޖުމްހޫރިއްޔާގެ މި ދަތުރުފުޅުން ރަމްޒުކޮށްދެނީ، 1984 ވަނަ އަހަރުގެ މެއި މަހުގެ 26 ވަނަ ދުވަހު ސިޔާސީ ގުޅުން ޤާއިމުކުރި ފަހުން، ދިވެހިރާއްޖެއާއި ގަތަރާ ދެމެދު އޮތް ގާތް ގުޅުމަށް ރާއްޖެއިން ދޭ ހާއްސަ އަހަންމިއްޔަތުކަމެވެ. ގަތަރަކީ އަބަދުވެސް ރާއްޖޭގެ ތަރައްގީއާއި ރައްޔިތުންގެ ލާބަޔަށް މުހިންމު މަސައްކަތްތަކެއް ކޮށްދެމުން އަންނަ ބައިވެރިއެކެވެ.