ގަތަރުގެ ކުރީގެ އަމީރު، ހިޒް ހައިނަސް ޝައިހް ހަމަދު ބިން ހަލީފާ އަލްޘާނީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ގަތަރުގެ އަމީރު ހިޒް ހައިނަސް ޝައިހް ތަމީމް ބިން ހަމަދު އަލްޘާނީއާ ބައްދަލުކުރައްވައި ތައުޒިޔާ ވިދާޅުވެއްޖެއެވެ.

ދޯހާގެ ލުސައިލް ގަޑުވަރުގައި މިރޭ ބޭއްވުނު މި ބައްދަލުކުރެއްވުމުގައި، ރައީސުލްޖުމްހޫރިއްޔާ ވަނީ ކުރީގެ އަމީރު އަވަހާރަވުމުގެ ހިތާމައިގައި ބައިވެރިވެވަޑައިގެން، ގަތަރުގެ އަމީރަށާއި، ޝާހީ އާއިލާއަށާއި، ގަތަރުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ނަމުގައި އިހްލާސްތެރި ތައުޒިޔާ ރައްދުކުރައްވާފައެވެ.

މި ބައްދަލުކުރެއްވުމުގައި ޤަޠަރުގެ އިސްވެރިންގެ ތެރެއިން ޑެޕިއުޓީ އަމީރު ޝައިޚް ޢަބްދުﷲ ބިން ޙަމަދު އަލްޘާނީ އާއި، އަމީރުގެ ހާއްސަ މަންދޫބު ޝައިހް ޖާސިމް ބިން ޙަމަދު އަލްޘާނީ އާއި، ޝައިޚް ޢަބްދުﷲ ބިން ހަލީފާ އަލްޘާނީގެ އިތުރުން ޝައިޚް މުޙައްމަދު ބިން ހަލީފާ އަލްޘާނީ ބައިވެރިވެވަޑައިގެންނެވިއެވެ.

މީގެ އިތުރުން ގަތަރުގެ ބޮޑުވަޒީރު އަދި ފޮރިން މިނިސްޓަރު ޝައިހް މުހައްމަދު ބިން އަބްދުއްރަހްމާން ބިން ޖާސިމް އަލްޘާނީ އާއި، އަވަހާރަވި އަމީރުގެ ބޭފުޅުންނާއި ޝާހީ އާއިލާގެ އެހެނިހެން އިއްޒަތްތެރިންވެސް މި ބައްދަލުކުރެއްވުމުގައި ބައިވެރިވެވަޑައިގެންނެވިއެވެ.

ރައީސުލްޖުމްހޫރިއްޔާގެ މި ދަތުރުފުޅަކީ ދިވެހިރާއްޖެއާއި ގަތަރާ ދެމެދު އޮތް ގާތް އަހުވަންތަ ގުޅުން ރަމްޒުކޮށްދޭ ދަތުރުފުޅެކެވެ. ގަތަރުގައި މިހާރު އިއުލާންކޮށްފައިވާ ގައުމީ ހިތާމައިގެ މި ދަނޑިވަޅުގައި ރައީސުލްޖުމްހޫރިއްޔާ އެ ގައުމަށް ވަޑައިގެން ތައުޒިޔާ ދެންނެވުމަކީ ދެ ގައުމުގެ ދެމެދުގައި އޮތް ވަރުގަދަ ގުޅުން ހާމަވެގެންދާ ކަމެކެވެ.

ޝައިހް ހަމަދު ބިން ހަލީފާ އާލް ސާނީ އަވަހާރަވުމުގެ ހިތާމައިގައި، ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.