ގަތަރުގެ ކުރީގެ އަމީރު، ޝައިހް ހަމަދު ބިން ހަލީފާ އާލް ސާނީ އަވަހާރަވުމުގެ ހިތާމައިގައި، ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.

މުޅި ގަތަރަށް ޒަމާނީ ބޮޑެތި ބަދަލުތަކެއް ގެންނެވުމުގައި އިސްކޮށް ހުންނެވި ޝެއިހް ހަމަދު އަވަހަރާވިއިރު، އުމުރުފުޅަކީ 74 އަހަރެވެ. ގަތަރުގެ އެންމެ އިސްވެރިޔާ އަމީރުގެ ރަސްމީ އޮފީސް، އަމީރީ ދިވާން ނެރުއްވި ބަޔާނެއްގައި ބުނީ، އެމަނިކުފާނު އަވަހަރާވެފައި ވަނީ އިއްޔެގެ ހެނދުނުގެ ވަގުތެއްގައި ކަމަށެވެ. އެމަނިކުފާނުގެ ހަށިކޮޅު އިއްޔެ މައްރިބު ނަމާދަށް ފަހު ވަނީ ރަސްމީ އިއްޒަތުގައި ފަސްނާދާލައިފަ އެވެ.

ރައިސް އޮފީހުން ބުނިގޮތުގައި، އެމަނިކުފާނު އަވަހާރަވުމުގެ ހިތާމައިގައި މިއަދު މެންދުރު 12:00 އިން ފެށިގެން މާދަމާ މެންދުރު 12:00 އަށް ދިވެހި ދިދަ ބައިދަނޑިއަށް ތިރިކުރަން ރައީސް ވަނީ ނިންމަވާފަ އެވެ.

މިގޮތަށް ހަމަޖެއްސެވި ސަބަބާ ގުޅޭގޮތުން ރައީސް އޮފީހުން ބުނީ، މިއީ ރާއްޖެއާއި ގަތަރާދެމެދު ޒަމާނުއްސުރެ އުފެދިފައިވާ ގާތް ރަހުމަތްތެރިކަމުގެ ގުޅުމާއި، ޝައިހް ހަމަދު ގަތަރުގެ އަމީރު ކަމުގެ މަގާމުގައި ހުންނެވިއިރު ރާއްޖެއާމެދު ބެހެއްޓެވި ގާތްކަމުގެ އަގުވަޒަންކުރުމުގެ ގޮތުން ނިންމެވި ނިންމެވުމެއް ކަމަށެވެ. ވަކިން ހާއްސަކޮށް ރާއްޖޭގެ ތަރައްގީއަށާއި ކުރިއެރުމަށް އެމަނިކުފާނު ވެދެއްވި ދީލަތި އެހީތެރިކަމާއި ބެހެއްޓެވި އެއްބާރުލެއްވުން ރައީސް ވަނީ ފާހަގަކޮށްފައި އެވެ.

މީގެ އިތުރުން، ޝައިހް ހަމަދު އަވަހާރަވުމާ ގުޅިގެން ގަތަރުގައި ބާއްވާ ރަސްމީ ހިތާމަފާޅުކުރުމުގެ ރަސްމިއްޔާތުގައި ބައިވެރިވެވަޑައިގަންނަވުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހެނދުނުގެ ވަގުތެއްގައި ވަނީ ގަތަރަށް ފުރާވަޑައިގަންނަވައިފަ އެވެ.