ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހެނދުނުގެ ވަގުތެއްގައި ގަތަރަށް ފުރާވަޑައިގެންފި އެވެ.
ރައީސް އޮފީހުން ބުނި ގޮތުގައި، ރައީސްގެ މި ދަތުރުފުޅަކީ ގަތަރުގެ ކުރީގެ އަމީރު، ޝައިހް ހަމަދު ބިން ހަލީފާ އަލް ސާނީ އަވަހާރަވުމާ ގުޅިގެން، އެމަނިކުފާނުގެ ދަރިކަލުން އަދި ގަތަރުގެ މިހާރުގެ އަމީރު ޝައިހް ތަމީމް ބިން ހަމަދު އަލް ސާނީއަށާއި އެ ގައުމުގެ ޝާހީ އާއިލާއަށް އިހުތިރާމް އަދާކުރެއްވުމަށް ކުރައްވާ ދަތުރުފުޅެކެވެ.
ޝައިހް ހަމަދު ބިން ހަލީފާ އަލް ސާނީ އަވަހާރަވީ އިއްޔެ ހެނދުނުގެ ވަގުތެއްގަ އެވެ. އެމަނިކުފާނުގެ މައްޗަށް ކުރެވުނު ކަށުނަމާދަށްފަހު، ހަށިކޮޅު ފަސްދާނުލާފައިވަނީ އިއްޔެގެ މައްރިބް ނަމާދަށްފަހުގައެވެ. މި ހިތާމަވެރި ދަނޑިވަޅުގައި ބޭރު ގައުމުތަކުގެ ގިނަ އިއްޒަތްތެރިންތަކެއް ގަތަރަށް ވަޑައިގަންނަވާނެ ކަމަށް ބެލެވޭ ކަމަށްވެސް ރައީސް އޮފީހުން ފާހަގަކުރި އެވެ.
Advertisement
ޝައިހް ހަމަދު އަވަހާރަވުމާ ގުޅިގެން ރައީސް ޑރ. މުއިއްޒު ވަނީ ގަތަރުގެ އަމީރަށާއި، ޝާހީ އާއިލާއަށާއި، އެ ގައުމުގެ ސަރުކާރާއި ރައްޔިތުންނަށް ތައުޒިޔާ ފޮނުއްވާފައެވެ. ރައީސްގެ ތައުޒިޔާގެ މެސެޖުގައި ވިދާޅުވީ، "އަލްމަރުހޫމް ޝައިޚް ހަމަދު ބިން ހަލީފާ އަލް ސާނީއަށް ޖަންނަތުލް ފިރުދައުސްގެ އެންމެ މަތީ ދަރަޖަ ދެއްވައި، ރަހުމަތް ލައްވާށި" އެވެ.
އަވަހާރަވި ޝައިހް ހަމަދަކީ 1995 ވަނަ އަހަރުން ފެށިގެން 2013 ވަނަ އަހަރާ ހަމައަށް ގަތަރުގައި ވެރިކަން ކުރެއްވި ބޭފުޅެކެވެ. އެމަނިކުފާނަކީ ގަތަރު ޒަމާނީ ފެންވަރަށް ތަރައްގީކޮށް ބިނާކުރުމުގައި އެންމެ އިސް ދައުރެއް އަދާކުރެއްވި މޭސްތިރިޔާގެ ގޮތުގައި ފާހަގަކުރެވޭ ބޭފުޅެކެވެ.
