ޣައްޒާގައި 19 އަހަރު ވަންދެން ހިނގަމުން އައި ހަމާސްގެ އިދާރީ ސަރުކާރު ރަސްމީކޮށް އުވާލައިފިއެވެ. މިއީ އެމެރިކާ އިސްވެ، ގަތަރާއި މިޞްރު މެދުވެރިވެގެން އެކުލަވާލި ޞުލްޙައިގެ "ބޯޑް އޮފް ޕީސް" މަގުޗާޓުގެ ދަށުން ނިންމި ނިންމުމެކެވެ. ހަމާސްއިން ވެރިކަން ދޫކޮށްލީ ޣައްޒާއަށް ދެމުންދާ ޙަމަލާތައް ހުއްޓުވުމަށާއި، އިސްރާއީލު ސިފައިން އެ ސަރަޙައްދުން ބޭލުމަށް މަގުފަހިކުރުމުގެ ބޭނުމުގައެވެ. މިއާއެކު ޣައްޒާގެ މުސްތަޤްބަލާއި މެދު ބައިނަލްއަޤްވާމީ ދުނިޔޭގައި ބޮޑެތި ބަހުސްތަކެއް ވަނީ ފެށިފައެވެ.

ހަމާސްގެ ސަރުކާރު އުވާލުމަށްފަހު ދެން ޣައްޒާގެ ވެރިކަމާ ޙަވާލުވާނީ "ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ގާޒާ" (އެންސީއޭޖީ) އެވެ. މި ކޮމިޓީގައި ހިމެނޭނީ ސިޔާސީ އެއްވެސް ޕާޓީއަކަށް ނިސްބަތްނުވާ، ތަޢުލީމީ އަދި ފަންނީ ފަލަސްޠީނުގެ ބޭފުޅުންނެވެ. މި ސަރުކާރުގެ އެންމެ އިސްވެރިއަކަށް ހުންނަވާނީ ފަލަސްޠީނު އޮތޯރިޓީގެ ކުރީގެ އިސް އޮފިޝަލެއް ކަމަށްވާ ޢަލީ ޝަޢުޘް އެވެ. މި ބަދަލާއެކު ޣައްޒާގެ އިދާރީ ހިންގުން ބަދަލުވެގެންދާނީ ސީދާ ސިޔާސީ ނޫން، ޓެކްނޮކްރެޓް ނިޒާމަކަށެވެ.

މި އާ ސަރުކާރަކީ އެމެރިކާގެ ބާރާއި ނުފޫޒު ވަރަށް ބޮޑަށް ހިނގާނެ ސަރުކާރެކެވެ. މީގެ މައިގަނޑު ބޭނުމަކީ އިސްރާއީލުގެ ސަލާމަތާއި ރައްކާތެރިކަން ކަށަވަރުކޮށްދިނުމެވެ. އެމެރިކާއިން އެކުލަވާލި މި ރޭވުމުގެ ސަބަބުން، އުފެދޭ އާ ސަރުކާރަކީ އިސްރާއީލަށް ނުރައްކަލެއް ނުވާނެ، އަދި ބައިނަލްއަޤްވާމީ ދުނިޔެއާ ގުޅިގެން މަސައްކަތްކުރާނެ "ވަފާތެރި" ސަރުކާރަކަށް ހެދުމަށް ވަނީ މަގުފަހިވެފައެވެ. ޚާއްޞަކޮށް ޣައްޒާ އަލުން ބިނާކުރުމުގެ ފަންޑުތައް ހިންގާނީ މި ކޮމިޓީގެ ބެލުމުގެ ދަށުންނެވެ.

ނަމަވެސް، މި ބަދަލާއި މެދު އިސްރާއީލުގެ ސަރުކާރުގެ ތެރޭގައި ޚިޔާލުތަފާތުވުންތައް އެބަހުއްޓެވެ. އިސްރާއީލުގެ ޚާރިޖީ ވަޒީރު ވިދާޅުވެފައި ވަނީ، ހަމާސްއިން މުޅިން ހަތިޔާރު ނުބަހައްޓާހާ ހިނދަކު، އުފެދޭ ކޮންމެ ސަރުކާރެއްގެ ފަހަތުގައިވެސް ހަމާސްގެ ހިޔަނި އޮންނާނެ ކަމަށެވެ. އެހެންކަމުން، މި ސަރުކާރުން އިސްރާއީލަށް ބޭނުންވާ ފުރިހަމަ ސަލާމަތީ ކަށަވަރުކަން ލިބޭނެތޯ އެމީހުން ޝައްކު އުފައްދައެވެ. ހަމާސް އިން ވެރިކަން ދޫކޮށްލި ނަމަވެސް، އެމީހުންގެ އަސްކަރީ ބާރު މުޅިން ނައްތައެއް ނުލެވެއެވެ.