ގ. ފުންފަޅުގޭގެ އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީތެރިވުމަށް 95,000 އަށްވުރެ ގިނަ ރުފިޔާ ހަރަދުކޮށްފިއެވެ.

ފުންފަޅުގޭގައި އަލިފާން ރޯވީ އާދީއްތަ ދުވަހުގެ ރޭ 22:50 ހާއިރު ގައެވެ. މި އަލިފާނުގެ ހާދިސާ ހިނގާފައިވަނީ ފުންފަޅުގެ 5 ވަނަ ފަންގިފިލާގެ އެޕާޓްމަންޓެއްގައެވެ. އެމްއެންޑީއެފް ފަޔަރ އެންޑް ރެސްކިއު ސާވިސްއިން ކުރި މަސައްކަތުން ގަޑިއެއްހާއިރު ތެރޭގައި އަލިފާންގަނޑު ވަނީ މުޅިން ކޮންޓްރޯލްކޮށްފައެވެ. މި ހާދިސާގައި އެއްވެސް މީހެއްގެ ފުރާނައަށް ގެއްލުމެއް ލިބިފައި ނުވި ނަމަވެސް، ބޯ ދުމުގެ އަސަރުކޮށްގެން ގިނަ ބަޔަކު ސިއްހީ އެހީތެރިކަން ހޯދާފައިވެއެވެ. އެގޮތުން ދުމުގެ އަސަރުލިބުނު 25 މީހަކަށް އައިޖީއެމްއެޗުން އަދި 3 މީހަކަށް އޭޑީކޭ ހޮސްޕިޓަލުން ވަނީ ފަރުވާދީފައެވެ.

މި ހާދިސާއާ ގުޅިގެން ގެތަކަށް ލިބުނު ގެއްލުންތައް ދެނެގަތުމަށްޓަކައި އެސެސްމަންޓް ހެދުމުގެ މަސައްކަތް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ދަނީ ކުރަމުންނެވެ. އެންޑީއެމްއޭއިން ވިދާޅުވީ މިއަދުގެ ވަގުތެއްގައި އެޕާޓްމަންޓްތަކުގެ ވެރިންނާއެކު ތަންތަން ބަލައި، ލިބިފައިވާ ގެއްލުންތަކުގެ އަންދާޒާއެއް ތައްޔާރުކުރާނެ ކަމަށެވެ. އަދި މި އެސެސްމަންޓަށް ފަހު، އަލިފާނުގެ ސަބަބުން ގެއްލުންލިބުނު ގެތަކަށް ފޯރުކޮށްދޭންޖެހޭ މާލީ އެހީތެރިކަން ދިނުމުގެ ކަންކަން ހަމަޖައްސާނެ ކަމަށްވެސް އެ އޮތޯރިޓީން މައުލޫމާތު ދެއެވެ.

މި ހާދިސާގައި ޖުމްލަ 109 މީހުންނަށް އަސަރުކޮށްފައިވާއިރު، ހާލުގައި ޖެހުނު ފަރާތްތަކަށް އިންސާނީ އެހީތެރިކަން ފޯރުކޮށްދިނުމަށް މިހާތަނަށް 95,000 (ނުވަދިހަ ފަސްހާސް) ރުފިޔާ ޚަރަދުވެފައިވާ ކަމަށް އެންޑީއެމްއޭއިން ހާމަކުރެއެވެ. އެގޮތުން އިމާރާތުގެ 22 އެޕާޓްމަންޓެއްގައި ދިރިއުޅޭ 93 މީހަކަށް ދެ ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިން ވަނީ ހަމަޖައްސައިދީފައެވެ. އަދި އަލިފާނުގެ އަސަރު އެންމެ ބޮޑަށް ކުރި 5 ވަނަ ފަންގިފިލާގެ ތިން އެޕާޓްމަންޓެއްގައި ދިރިއުޅޭ 16 މީހަކަށް، ފަސް ދުވަހުގެ މުއްދަތަށް ބޯހިޔާވަހިކަމާއި ކެއިންބުއިމުގެ އެހީތެރިކަން ވަނީ ފޯރުކޮށްދީފައެވެ.

އެންޑީއެމްއޭއިން ވިދާޅުވީ އަލިފާން ރޯވި އެޕާޓްމަންޓްތައް ފިޔަވައި އެހެން ތަންތަނަށް ދުމާއި ގެދަބުޅީގެ އަސަރުކޮށްފައިވާތީ، އެތަންތަން ސާފުކުރުމުގެ މަސައްކަތް މިހާރު ކުރިއަށްދާ ކަމަށެވެ. އަދި ސިއްހީގޮތުން ރައްކާތެރިކަން ކަށަވަރުކުރުމަށްފަހު މީހުންނަށް އަލުން އެޕާޓްމަންޓްތަކަށް ބަދަލުވެވޭނީ ދެދުވަސްވަރު ހޭދަވާނެ ކަމަށް އެއޮތޯރިޓީން ލަފާކުރެއެވެ. ނަމަވެސް އަލިފާން ރޯވި 5 ވަނަ ފަންގިފިލާގެ އެޕާޓްމަންޓްތަކުގައި ދިރިއުޅޭ މީހުންނަށް އެތަންތަނަށް އަލުން ބަދަލުވެވޭނީ މަރާމާތުގެ ބޮޑެތި މަސައްކަތްތަކެއް ކޮށް ނިމުމުންނެވެ.